مظفرآباد(آن لائن) بھارتی افواج کی لائن آف کنٹرول (ایل او سی)کے قریب آزاد جموں و کشمیر بلااشتعال فائرنگ کے نتیجے میں ایک نوجوان جاں بحق جبکہ 2 شدیدزخمی ہوگئے۔سینئر سپرنٹنڈنٹ پولیس (ایس ایس پی)چوہدری ذوالقرنین سرفراز کے مطابق ہلاکتضلع کوٹلی کے تتہ پانی سیکٹر میں ہوئی ، جہاں بھارتی شیلنگ کا آغاز پیر کی علی الصبح پونے 5 بجے کے قریب ہوا۔ایس ایس پی کے مطابق بھارتی فوج نے بلااشتعال فائرنگ کی

اور معمول کے مطابق شہری آبادی کو نشانہ بنایا۔انھوں نے بتایا کہ بھابھرا گاؤں میں بھارتی فائرنگ کے نتیجے میں 18 سالہ نوجوان اسد موقع پر ہی جاں بحق ہوگیا۔ جبکہ بھابھرا اور دھانہ گاؤں میں بالترتیب ایک 17 سالہ نوجوان شاہ زیب اور 18 سالہ وقار شدید زخمی ہوگئے۔ایس ایس پی کا کہنا تھا کہ اگرچہ فائرنگ کا سلسلہ رک گیا، لیکن کچھ معلوم نہیں کہ کب بھارتی فورسز دوبارہ سے فائرنگ کا آغاز کردیں۔تتہ پانی سیکٹر سے موصولہ اطلاعات میں بتایا گیا ہے کہ بھارتی فوج کی فائرنگ شدید تھی لیکن پاکستانی فوجیوں نے بھرپور جواب دیا جس کے بعد دشمن کی توپیں خاموش ہو گئیں۔حکام کے مطابق رواں برس جنوری سے اب تک بھارت لائن آف کنٹرول پر 400 سے زائد مرتبہ سیز فائر معاہدے کی خلاف ورزی کرچکا ہے، جبکہ گذشتہ برس یہ تعداد 382 تھی۔حالیہ ہلاکت کے بعد جنوری سے اب تک بھارتی فورسز کی فائرنگ سے ہلاک ہونے والوں کی تعداد 10 تک جا پہنچی ہے جبکہ ان واقعات میں 65 سے زائد افراد زخمی بھی ہوئے۔پاکستان اور ہندوستان کے تعلقات میں گذشتہ برس ہونے والے اڑی حملے کے بعد سے کشیدگی پائی جاتی ہے اور ہندوستان کی جانب سے متعدد مرتبہ لائن آف کنٹرول اور ورکنگ باونڈری کی خلاف ورزی کی جاچکی ہے۔ان واقعات کے بعد ہندوستان کے ڈپٹی ہائی کمشنر کو کئی مرتبہ دفتر خارجہ طلب کرکے سیز فائر معاہدے کی خلاف ورزی پر احتجاج ریکارڈ کرایا گیا

اور بھارتی سفارتکار سے مطالبہ کیا گیا کہ وہ اس بات کی یقین دہانی کرائیں کہ ان واقعات کی تحقیقات کی جائیں گی اور اس کی تفصیلات پاکستان کے ساتھ شیئر کی جائیں گی۔

موضوعات:کنٹرول لائن