نیویارک ٗد ہلی(این این آئی)عالمی ادارہ صحت (ڈبلیو ایچ او) نے کہا ہے کہ بھارت میں کورونا وائرس کی تین اقسام تیزی سے وائرس پھیلانے کا سبب ہوسکتی ہیں۔عالمی ادارہ صحت نے اپنے بیان میں کہاکہ بھارت میں کورونا مریض ہسپتالوں کا رخ کررہے ہیں جو مسئلے کا سبب بن رہا ہے جبکہ کورونا مریضوں کی گھر میں رہتے ہوئے بھی دیکھ بھال کی جاسکتی ہے۔ڈبلیو ایچ او کے مطابق

بھارت میں کورونا مریضوں کیلئے چار ہزار آکسیجن کنسنٹریٹرز بھجوانے کیلئے کام کررہے ہیں۔عالمی ادارہ صحت کے مطابق بھارت میں کورونا وائرس کی تین اقسام تیزی سے وائرس پھیلانے کا سبب ہوسکتی ہیں تاہم بھارت میں حالیہ بڑے اجتماعات سمیت دیگر عوامل نے بھی کورونا وبا پھیلانے میں کردار اداکیا ہے۔دوسری جانب  دہلی کی ریاستی حکومت نے ہائی کورٹ کی درخواست پر شہرکا لگژری ہوٹل ججوں اور ان کے اہل خانہ کے لیے کوویڈ سینٹر میں تبدیل کردیا۔میڈیا رپورٹ کے مطابق مقامی حکومت کے بیان میں کہا گیا ہیکہ دہلی ہائی کورٹ کی درخواست پر لگژری ہوٹل کے 100 کمروں کو کوویڈ سینٹر بنا دیا گیا ہے، شہر کا بڑا ہسپتال لگڑری ہوٹل کیکورونا سینٹر کی نگرانی کریگا۔ اپوزیشن جماعت کانگریس کے ترجمان جیویر شیرگل نے حکومتی فیصلے پر تنقید کرتے ہوئے کہناہے کہ حکومتی فیصلہ آئین میں شامل مساوی حقوق کے برخلاف ہے، عدالت خود اس خصوصی برتاؤ کے فیصلے کو مسترد کرے۔دوسری جانب ریاستی حکام اور دہلی ہائی کورٹ رجسٹرار دفترکی جانب سے خبر پر کوئی تبصرہ نہیں کیا گیا۔

خیال رہے کہ بھارت میں مسلسل چھٹے روز کورونا وائرس کے تین لاکھ سے زائد کیسز رپورٹ ہوئے ہیں۔بھارت میں مسلسل لاکھوں کیسز سامنے آنے سے انتہائی بدترین صورتحال کا سامنا ہے جہاں ہسپتال مکمل بھر چکے ہیں اور مریضوں کیلئے آکسیجن کی قلت ہے اور آکسیجن نہ ملنے سے متعدد اموات ہوئی ہیں۔

موضوعات:کرونا