دبئی(این این آئی)مسیحیوں کے مذہبی پیشوا پوپ فرانسس نے یمن جنگ کے بارے میں خدشات کا اظہار کرتے ہوئے کہاہے کہ یمن میں لوگ طویل لڑائی سے تھک چکے ہیں اور بچے بھوک کا شکار ہیں انہیں خوراک تک رسائی نہیں ہے۔ ان بچوں اور ان کے والدین کی آہیں خدا تک پہنچ رہی ہیں۔

میڈیارپورٹس کے مطابق اس سے قبل وہ تاریخی دورے پر متحدہ عرب امارات پہنچے ،دبئی پہنچنے پر ولی عہد شیخ محمد بن زید النہیان نے ان کا استقبال کیا۔پوپ ایک بین المذہبی کانفرنس میں شرکت کے لیے دبئی پہنچے ہیں جس میں منگل کو قریباً ایک لاکھ بیس ہزار افراد شرکت کریں گے۔متحدہ عرب امارات کے لیے روانگی سے قبل انھوں نے یمن جنگ کے بارے میں خدشات کا اظہار کیا جس میں متحدہ عرب امارات بھی شریک ہے۔پوپ کا کہنا تھا کہ یمن میں لوگ طویل لڑائی سے تھک چکے ہیں اور بچے بھوک کا شکار ہیں انہیں خوراک تک رسائی نہیں ہے۔ان کا کہنا تھا کہ ان بچوں اور ان کے والدین کی آہیں خدا تک پہنچ رہی ہیں۔ابھی یہ واضح نہیں ہے کہ آیا پوپ اس مسئلے کو متحدہ عرب امارات کے دورے کے دوران نجی سطح پر اجاگر کریں گے یا کسی عوامی فورم پر۔ متحدہ عرب امارات سعودی قیادت میں یمن کے خلاف جاری جنگ میں شامل ہے۔منگل کے اجتماع کے لیے پاسز حاصل کرنے کے لیے لوگ قطاروں میں کھڑے رہے۔ ان میں سے کچھ نے بتایا کہ پوپ کے دورے سے برداشت کے حوالے سے ان گفتگو کا آغاز ہو گا جس کے بارے میں سارے دنیا سننا چاہتی ہے۔

موضوعات:پوپ فرانسس