تہران(انٹرنیشنل ڈیسک)ایران کے سپریم لیڈر آیت اللہ علی خامنہ ای نیاعتراف کیا ہے کہ امریکا کے دباؤ اور اقتصادی مسائل کے پیش نظر ایرانی عوام اس وقت ایک مشکل دور سے گزر رہے ہیں ۔غیرملکی خبررساں ادارے کے مطابق انھوں نے تہران میں بسیج ملیشیا اور پاسداران انقلاب ایران کے ہزاروں اہلکاروں کے ایک اجتماع سے خطاب کرتے ہوئے کہی ۔خامنہ ای نے کہاکہ قوم ، خطے اور دنیا کی صورت حال حساس ہے۔ بالخصوص ایران کے عوام کے لیے صورت حال بہت ہی نازک ہے اور یہ اس لحاظ

سے حساس اور نازک ہے کہ ایک طرف تو ہمیں استعماری امریکا کے سیاست دانوں اور طاغوتی طاقتوں کی غوغا آرائی کا سامنا ہے ، دوسری جانب قوم کو درپیش اقتصادی مسائل ہیں اور ملک کے کمزور طبقے کے ایک بڑے حصے کا معیار زندگی پست تر ہوتاجارہا ہے۔انکا کا کہنا تھا کہ ایران کو جوابی تھپڑ رسید کرنا چاہیے اور پابندیوں کو شکست دے کر امریکا کو شکست سے دوچار کرنا چاہیے۔انھوں نے کہا کہ اللہ کی مہربانی سے ہم پابندیوں کو شکست دیں گے اور یہ شکست امریکا کی بھی ہار ہوگی۔

موضوعات:ایرانی سپریم لیڈر