واشنگٹن(این این آئی)امریکی صدر ٹرمپ نے کہاہے کہ سعودی عرب اور امریکا کے درمیان تعلقات ماضی کے تمام ادوار کی نسبت سب سے زیادہ مضبوط اور بہترین ہیں۔غیرملکی خبررساں ادارے سے مختصر بات چیت میں انہوں نے کہاکہ سعودی ولی عہد نے مجھے اپنی میزبانی کا شرف بخشا۔ ہماری مضبوط اور دیرینہ دوستی نے ہمیں ایک بار پھر آپس میں ملایا ہے۔ ہم ایک دوسرے کو سمجھنے کی کوشش کررہے ہیں۔

میں جانتا ہوں کہ سعودی عرب اور امریکا کے درمیان باراک اوباما کے دور میں تعلقات مثالی نہیں تھے مگر میری حکومت میں سعودی عرب اور امریکا کے درمیان اعتماد اور تعلقات میں مزید استحکام آیا ہے۔ دونوں ملکوں کی جانب سے ایک دوسرے کے ہاں سرمایہ کاری سے تعلقات مزید مستحکم ہوں گے۔ امریکا سعودی عرب کے دفاع کو مشرق وسطیٰ میں انتہائی اہمیت کا حامل سمجھتا ہے۔ امریکی صدر نے کہا کہ ہم نے داعش کا قبضہ 100 فی صد ختم کردیا ہے۔ سعودی ول عہد کے ساتھ ہونے والی بات چیت میں مشرق وسطیٰ کے تنازعات زیربحث آئے۔ ماضی میں طے پائے سمجھوتوں کو ہم عملی شکل دینے کی کوشش کررہے ہیں۔ ٹرمپ نے کہا کہ دہشت گردی کی فنڈنگ روکنے کے لیے سعودی عرب کے ساتھ مل کر کام کررہے ہیں۔ ہم ریاست اور دہشت گردی کے درمیان تعلق کو ختم کرنے کے لیے کوشاں ہیں۔ اس حوالے سے الریاض میں ہونے والی کانفرنس سب سے شاندار اجلاس تھا۔

موضوعات:ٹرمپ