لندن(مانیٹرنگ ڈیسک) قسمت کبھی یوں بھی مہربان ہوتی ہے کہ انسان دیکھتا ہی رہ جاتا ہے ، یہ مثال برطانیہ میں دو پاکستانی نژاد میاں بیوی پر اس وقت پوری ہوئی جب انہوں نے برطانیہ کے ایک چینل ، چینل 5پر ہرجانے کا دعویٰ کیا۔ عدالت نے چینل 5کی انتظامیہ کو اس پاکستانی نژاد جوڑے کو ہرجانہ ادا کرنے کا حکم دیدیا ہے ۔ واقعہ کچھ یوں ہے کہ 51سالہ شاکر علی اور ان کی 49سالہ اہلیہ

شاہدہ اسلم دونوں بے روزگار تھے جس کی وجہ سے وہ کئی ماہ سے اپنے گھر کا کرایہ ادا نہ کر سکے چنانچہ انہیں گھر سے بے دخل کر دیا گیا۔جب انہیں مشرقی لندن کے علاقے بارکنگ میں واقع گھر سے نکالا جا رہا تھا تو چینل 5نے ان کی ویڈیو بنا کر اپنے پروگرام ”کین ناٹ پے؟ وی وِل ٹیک اِٹ اوے“ (Can’t Pay? We’ll Take It Away)میں چلا دی۔ اس ویڈیو میں شاکر علی نے محض پاجامہ پہن رکھا ہوتا ہے اور بیساکھیوں پر چلتا ہوا اپنے بیوی بچوں کے ساتھ گھر سے باہر نکل رہا ہوتا ہے۔ شاکر اور شاہدہ نے اس ویڈیو کو ہتک آمیز قرار دیا اور چینل کے خلاف ہائی کورٹ سے رجوع کر لیا۔ اب عدالت نے فیصلہ سناتے ہوئے چینل کو حکم دیا ہے کہ وہ اس جوڑے کو 20ہزار پاؤنڈ (تقریباً 31لاکھ روپے) ہرجانہ ادا کرے۔چینل انتظامیہ نے عدالتی فیصلے کو قبول کرتے ہوئے اسے خوش آمدید کہا ہے ۔ ان کا کہنا ہے کہ ہم اس عدالتی فیصلے کو خوش آمدید کہتے ہیں تاہم ہمارا مقصد بدنیتی پر مبنی نہیں تھا ہم نے دونوں میاں بیوی کی گھر سے نکالے جانے کی ویڈیو عوامی مفاد کو مد نظر رکھتے ہوئے چلائی تھی۔واضح رہے کہ برطانیہ ، کینیڈا اور امریکہ میں ٹی وی، اخبارات یا ریڈیو پر کسی بھی شہری کی کوئی ایسی چیز نشر  یا شائع کی جائے جو کہ بدنیتی یا ہتک ثابت ہو جائے تو اس ٹی وی چینل، اخبار یا ریڈیو کو بھاری جرمانہ ادا کرنا پڑتا ہے اور یہ جرمانہ حکومتی خزانے میں نہیں بلکہ متاثرہ فریق کو ادا کرنے کا حکم دیا جاتا ہے۔

موضوعات:پاکستانی نژاد میاں بیوی چینل 5