سیئول(این این آئی)اقوام متحدہ میں شمالی کورین مندوب نے حالیہ میزائل تجربے کو امریکا کیلئے تحفہ قرار دیتے ہوئے مزید میزائل تجربوں کی دھمکی دے ڈالی۔میڈیارپورٹس کے مطابق جینوا میں اقوام متحدہ کے انسداداسلحہ اجلاس میں شمالی کورین مندوب ہان تائی

سونگ کا کہنا تھا کہ شمالی کوریا کاحالیہ میزائل تجربہ ملکی دفاع میں کیا گیا، شمالی کوریا کاحالیہ میزائل تجربہ امریکا کیلئے تحفہ ہے۔امریکا شمالی کوریا پردباو بڑھاتارہا تواسے مزید تحفے ملیں گے،شمالی کوریا نے دودن قبل چھٹا بیلسٹک میزائل تجربہ کیا ہے۔جس کے بعد سے امریکا اور شمالی کوریا کے درمیان کشیدگی میں کئی گنا اضافہ ہوا ہے۔دوسری جانب اقوامِ متحدہ میں امریکہ کی سفیر نکی ہیلی نے کہا ہے کہ شمالی کوریا کے سربراہ کم جونگ ان جنگ کی “بھیک مانگ رہے ہیں” لیکن انہیں پتا ہونا چاہے کہ امریکہ کا صبر جواب دے رہا ہے۔غیرملکی خبررساں ادارے کودیئے گئے ایک انٹرویومیں انہوں نے کہاکہ کم جنگ ان کی جانب سے میزائلوں کا بے دریغ استعمال اور جوہری حملے کی دھمکیاں ظاہر کرتی ہیں کہ وہ کسی بھی طرح جنگ شروع کرنا چاہتے ہیں۔انہوں نے کہا کہ امریکہ پہلے بھی کبھی جنگ کا خواہش مند نہیں رہا اور نہ اب جنگ چاہتا ہے لیکن ان کے بقول امریکہ اس طرح کا رویہ مستقل برداشت نہیں کرسکتا۔نکی ہیلی نے خبردار کیا کہ امریکہ ہر صورت اپنا، اپنی سرزمین اور اپنے اتحادیوں کا دفاع کرے گا۔

موضوعات:امریکہ بیلسٹک میزائل تجربہ شمالی کوریا