واشنگٹن (آئی این پی )یورپی یونین نے اس بات کا اعتراف کیا ہے کہ خطے میں پاکستان کا کردار بہت اہم ہے، جب تک افغانستان کے معاملے پر پاکستان تعاون کرنے والا ساتھی نہیں بنتا ہمارے لئے مشکل ہوگا کہ ہم من چاہے نتائج حاصل کر سکیں۔امریکی نشریاتی ادارے کو انٹرویو دیتے ہوئے یورپی یونین کے خصوصی نمائندے اور افغانستان کیلئے یورپی یونین کے وفد کے سربراہ فرانز مائیکل ملبن

نے افغانستان کی صورتحال، پاکستان کا خطے میں کردار اور طالبان کے ساتھ امن بات چیت کے ٹھوس اقدامات پر زور دیا ہے۔ملبن کا کہنا ہے کہ ہمیں افغانستان میں امن کے حصول اور طالبان کے ساتھ امن عمل کو آگے بڑھانے کے لئے زیادہ توجہ اور کوشش سیاسی حل ڈھونڈنے کے لئے کرنی چاہیئے۔انھوں نے کہا کہ یہ اتنا آسان نہیں ہوگا اور اس کے لئے مشکل فیصلے کرنے ہون گے۔ اس کے لئے، سٹریٹجک ماحول میں تبدیلی لانی ہوگیجس سے طالبان کو قائل کرنا آسان ہو کہ وہ مذاکرات کی میز پر آئیں۔ حالیہ صورتحال کو میں آہستہ سے خراب ہونے والی تعطل کی صورتحال کہوں گا۔ اسے روکنا ہوگا۔خطے میں پاکستان کے کردار پر گفتگو کرتے ہوئے، نمائندہ خصوصی نے کہا ہے کہ پاکستان کا کردار بہت اہم ہے۔ اس کا اپنا نظریہ ہو سکتا ہے کہ اس کا کس قسم کا کردار ہونا چاہیئے یا اسے کیا کرنا چاہیئے۔ملبن کا مزید کہنا ہے کہ جب تک افغانستان کے معاملے پر پاکستان تعاون کرنے والا ساتھی نہیں بنتا، ہمارے لئے مشکل ہوگا کہ ہم من چاہے نتایج حاصل کر سکیں۔یورپی یونین کے خصوصی نمائندے نے کہا ہے کہ یہ طویل عرصے سے ایک چیلنج رہا ہے۔ امریکہ اور یورپی یونین جو چاہتے ہیں پاکستان اس سے بلکل مختلف سوچ رکھتا ہے۔ یہاں پر ایک خلا ہے جسے پر کرنے کی ضرورت ہے۔

موضوعات:افغانستان یورپی یونین