اسلام آباد(رئیس احمد خان) کشمیر امور اور گلگت بلتستان کے وفاقی وزیر محمد برجیس طاہر نے بھارت کی پاک چین اقتصادی راہداری منصوبے میں شمولیت کو مسئلہ کشمیر کے حل سے منسلک کردیا ہے۔یوم یکجہتی کشمیر کے حوالے سے منعقدہ ایک پریس کانفرنس میں وفاقی وزیر کا کہنا تھا کہ ‘اگر راہداری منصوبے کا حصہ بننے

کی خواہش ہے تو بھارت کو مسئلہ کشمیر اقوام متحدہ کی منظور کردہقرار دادوں کی روشنی میں حل کرنا چاہیے۔انھوں نے کہا کہ پاکستان مذاکرات کے ذریعے بھارت کے ساتھ تمام تصفیہ طلب معاملات کو حل کرنے کا خواہاں ہے، جس میں کشمیر بھی شامل ہے، تاہم نئی دہلی اصل حقائق کو چھپانے کیلئے کشمیر میں طاقت کا بے دریغ استعمال کررہا ہے۔وفاقی وزیر نے کہا کہ بھارت کشمیریوں کے حق آزادی کی تحریک کو طاقت سے دبانے میں ناکام ہوگیا ہے۔ان کا کہنا تھا کہ ‘پاکستان نے ہمیشہ کشمیریوں کے جائز موقف اور ان کے حق خود ارادیت کی حمایت کی ہے اور ایسا کرتا رہے گا۔انھوں نے کہا کہ ‘ہم کشمیریوں کی ہر سطح پر سیاسی اور سفارتی حمایت جاری رکھیں گے۔وفاقی وزیر نے اعلان کیا کہ کشمیریوں سے اظہار یکجہتی کا دن ‘یوم یکجہتی کشمیردنیا بھر کے مختلف ممالک میں موجود پاکستان کے تمام سفارت خانوں میں منایا جائے گا جس کا مقصد بھارت کے زیر انتطام کشمیر کے عوام پر ہونے والے بھارتی فورسز کے مظالم کی نشاندہی کرنا ہے۔

موضوعات:بھارت پاکستان چین سی پیک