جدہ(مانیٹرنگ ڈیسک)سعودی حکومت نے بھارتی مسلمانوں کے حج کوٹہ میں غیرمعمولی اضافہ کردیاہے ۔سعودی حکومت نے بھارتی مسلمانوں کے حج کوٹہ میں ساڑھے 34ہزارحاجیوں کااضافہ کیاہے جس کے بعد رواں سال پونے دولاکھ بھارتی مسلمان فریضہ حج اداکرینگے ۔سعودی حکومت نے بھارت کے کوٹے میں 29سال بعد یہ اضافہ کیاہے ۔

بھارتی میڈیارپورٹس کے مطابق عازمین حج کے کوٹہ میں اضافہ کےحوالے سے سعودی حکومت اور بھارت میں معاہدہ گزشتہ سال طے پایاتھاجس کے تحت رواں سال 2017ء میں 34500 عازمین حج کے کوٹہ بڑھا دیا گیا ہے، بھارتی وزیر مملکت برائے اقلیتی امور سید مختار عباس نقوی اور سعودی وزیر برائے حج و عمرہ ڈاکٹر محمد صالح بن طاہر نے حج 2017ء کے کوٹے میں اضافہ سے متعلق ایک تقریب میں دستخط کئے۔بھارتی وزیر مملکت برائے اقلیتی امور سید مختار عباس نقوی نے اس موقع پرکہاکہ یہ انتہائی خوشی کی بات ہے کہ سعودی حکومت نے ہندوستانی عازمین حج کوٹے میں 34500کا اضافہ کردیا ہے۔ انہوں نے بتایا کہ 1988ء کے بعدبھارت سے سفرحج پر جانے والے عازمین کے کوٹے میں پہلی بار اتنا بڑا اضافہ کیا گیا ہے۔
مختار نقوی نے بتایا کہ بھارتی عازمین کے کوٹے میں اضافہ، حج2017ء کے دوران عازمین کے لئے ٹرانسپورٹ، رہائش اور حفاظتی انتظامات سے متعلق امور طے پاگئے ہیں۔انہوں نے کہاکہ حج کا عمل بھارت اور سعودی عرب کے باہمی رشتوں کو مضبوط بنانےمیں مددملے گی اوردونوں ممالک کے درمیان نئے تعلقات کے ایک نئے دورکا اغازہوگا۔

موضوعات:حج کوٹہ سعودی حکومت