کوئٹہ (این این آئی)بلوچستان میں بچوں، خواتین اور مردوں میں کینسر کی مختلف بیماریوں میں تشویش ناک اضافہ صوبائی حکومت کی جانب سے بی ایم سی کی کینسر وارڈ کے لئے ہر سال بجٹ میں صرف12 لاکھ روپے مختص کئے جارہے ہیں،

تفصیلات کے مطابق بلوچستان میں سینکڑوں کی تعداد میں بچے، خواتین اور مردوں سمیت ہر عمر کے افراد مختلف اقسام کے کینسر میں مبتلا ہیں مردوں میں سانس کی نالی کا کینسر، خواتین میں چھاتی جبکہ نوجوانوں اور بچوں میں خون کے کینسر کے کیس میں اضافہ ہو رہا ہے،ادھر کوئٹہ کے بولان میڈیکل کمپلیکس ہسپتال میں محدود پیمانے پر 40 بستروں پر مشتمل کینسر وارڈ عارضی طور پر قائم ہے جہاں کینسر میں مبتلا افراد علاج کے لئے آتے ہیں تاہم متعلقہ محکمے کی غیر سنجیدگی کے باعث کینسر کے وارڈ کا سالانہ بجٹ صرف 12 لاکھ روپے ہے،سرطان کے علاج کے لئے باقائدہ ہسپتال نہ ہونے اور سہولت کی عدم دستیابی کی وجہ سے مریض یا تو دوسرے صوبوں کا رخ کرنے پر مجبور ہیں یا پھر موت کا شکار ہوجاتے ہیں، ترجمان حکومت بلوچستان لیاقت شاہوانی نے نجی ٹی وی سے گفتگو میں کہا ہے کہ صوبائی کابینہ نے شیخ زیدہسپتال کوئٹہ میں کینسر اسپتال کی تعمیر کا اعلان کیا ہے ہسپتال کی تعمیر کا جلد سنگ بنیاد رکھ دیا جائیگا۔

موضوعات:کینسر