لاہور ( این این آئی) روزے سے فائدہ اٹھانے کے لئے سنت نبویﷺ کے مطابق افطاری و سحری کا اہتمام کیا جائے۔ان خیالات کا اظہار مقررین نے پاکستان طبی کانفرنس لاہور ڈویژن کے زیراہتمام پروفیسر حکیم منصورالعزیز کی زیر صدارت ایک مجلس مذاکرہ کا انعقاد ہوا جس میں مقررین نے روزہ اور ہماری صحت کے موضوع پر اظہار خیال کیا۔

جنرل سیکریٹری پاکستان طبی کانفرنس پنجاب حکیم محمد احمد سلیمی ،پروفیسر حکیم منصورالعزیز ،حکیم سید عمران فیاض ،حکیم احمد حسن نوری ،حکیم امجد وحید بھٹی ،حکیم محمد افضل میو ،حکیم حامد محمود، حکیم ڈاکٹر عمر فاروق گوندل ،حکیم ڈاکٹر محمد ابو بکر، حکیم عبدالرزاق ربانی، حکیم فیصل طاہر صدیقی، حکیم وحید الحسن چشتی ، حکیم ریاض احمد، ڈاکٹر سکندر حیات زاہد اور دیگر اطباء کرام نے اظہار خیال کرتے ہوئے کہا کہ روزہ جسمانی و روحانی امراض سے بچاؤ کا بہترین ذریعہ ہے،دور حاضر کی عام اور پریشان کن امراض موٹاپا‘ بلڈپریشر‘ ذیابیطس‘ امراض قلب‘ معدہ‘ جگر‘ آنتوں اور گردوں کے امراض کے اسباب کا جائزہ لینے کے بعد یہ بات پائیہ ثبوت کو پہنچ چکی ہے کہ مندرجہ بالا امراض کی بڑی وجہ کھانے پینے میں بے اعتدالی، نظام ہضم کی خرابی اور روزمرہ معمولات میں عدم توازن جیسے عوامل شامل ہیں جس سے معدہ خراب ہو جاتا ہے۔انہوں نے کہا کہ روزے سال بھر کے لیے جسم انسانی کی صحت کے باغ کو ہرا بھرا رکھتے ہیں، ماہ رمضان درحقیقت صحت انسانی کا سدا بہار گلشن ہے مگر روزہ سے ہم اسی صورت فائدہ اٹھا سکتے ہیں جب سنت نبویﷺ کے مطابق افطاری و سحری کا اہتمام کیا جائے یعنی موجودہ موسم میں کھجور اور دودھ کے ساتھ افطاری اور سحری کے وقت سادہ اور ہلکی پھلکی غذا کھائی جائے۔انہوں نے کہا کہ اب تو مغرب کے معالجین بھی ’’روزہ‘‘ کی اہمیت کو تسلیم کرتے ہیں،یورپ میں روزہ کی طرز پرفاقے کو علاج کے لیے ایک مستقل طریق علاج کی حیثیت حاصل ہے،روزہ سے مختلف امراض کا علاج کیا جاتا ہے اور اس سے بہت سے مریض عروس صحت سے ہمکنار ہو جاتے ہیں۔

موضوعات:ﺭﻭﺯﮦ ماہرین