ممبئی(این این آئی) بھارتی ٹی وی کے مقبول ترین مزاحیہ اداکار کپل شرما نے اپنے کامیڈی شو کے دوسرے سیزن کے ساتھ دھماکے دار انٹری دی ہے تاہم انہیں اپنے پچھلے شوز کی ناکامی کی بھاری قیمت چکانی پڑی ہے۔نامور کامیڈین کپل شرما کے کامیڈی شو’دی کپل شرما شو‘کے پہلے

سیزن نے مقبولیت میں سب کو پیچھے چھوڑدیاتھا۔ کپل کامیڈی شو کے گزشتہ سیزن کی ہفتہ وار اقساط کا معاوضہ 60 سے 80 لاکھ روپے لیتے تھے تاہم سنیل گروور سے لڑائی اورکپل کی آئے روز خراب رہنے والی طبعیت کے باعث اچانک شو کی ریٹنگ مسلسل گرنا شروع ہوگئی تھی اور بالآخر شو کو بند کرنا پڑگیاتھا۔کپل 2018 کے وسط میں ایک بارپھر ایک اور شو’فیملی ٹائم ود کپل شرما‘ کے ساتھ واپس آئے لیکن یہ شو بھی ناکام رہا اورایک یا دواقساط کے بعد یہ شو بھی بند کرنا پڑا۔ تاہم اب کپل نے 2018 کے آخر میں ایک بار پھر ’دی کپل شرماشو سیزن2‘کے ساتھ دھماکے دار انٹری دی ہے۔شو پہلی ہی قسط سے عوام میں مقبولیت حاصل کرچکا ہے لیکن کپل کو اپنے پچھلے شوز کی ناکامی کی بھاری قیمت چکانی پڑی ہے۔ جہاں کپل کو گزشتہ سیزن کی ہفتہ وار اقساط کے 60 سے 80 لاکھ روپے ملتے تھے وہیں اب ان کے معاوضے میں کمی کرتے ہوئے انہیں ہفتہ وار اقساط کے 15 سے 20 لاکھ روپے مل رہے ہیں۔ جب کہ شومیں شامل کرشنا ابھیشیک اوربھارتی سنگھ کو 10 سے 12 لاکھ روپے مل رہے ہیں۔

موضوعات:کپل شرما