لاہور(این این آئی)ایران پاک فیڈریشن آف کلچر اینڈ ٹریڈ کے صدر خواجہ حبیب الرحمان نے کہا ہے کہ سیاستدانون میں بڑھتی ہوئی خلیج ملک کے حق میں بہتر نہیں جس کا ادراک کیا جانا وقت کی ضرورت ہے ،مضبوط معیشت پاکستان کی بقاء کیلئے نا گزیر ہے جس کیلئے روایتی اقدامات سے

دو قدم آگے بڑھ کر کام کرنا ہوگا،حکومت آئند ہ مالی سال کے بجٹ کے لئے تمام اسٹیک ہولڈرز سے تجاویز کے حصول کیلئے کانفرنسز کا انعقاد کرے ۔ ان خیالات کا اظہارا نہوں نے وسطی پنجاب سے تعلق رکھنے والے تاجروں کے نمائندہ وفد سے ملاقات میں گفتگو کرتے ہوئے کیا ۔خواجہ حبیب الرحمان نے کہا کہ اگر پاکستان کو آگے لے کر جانا ہے تو تمام سیاستدانوں کو اپنے ذاتی مفادات سے بالا ترہو کر سوچنا ہوگا ۔ قومی معاملات پر اتفاق رائے کے لئے تمام سیاسی جماعتوں پر مشتمل ایک موثر فورم تشکیل دیا جائے اور اس کے فیصلوں کو موثر بنانے کیلئے قانون سازی کی جائے ۔ آپس کے اختلافات نے معیشت کو تباہی کے دہانے پر پہنچا دیا ہے جس سے ہماری بقاء خطرے سے دوچار ہے ۔انہوں نے کہا کہ معیشت کے معاملے میں روایتی سیاست کا تڑکا لگانے کی بجائے قوم کو اصل حقائق سے آگاہ کرنے کیساتھ حالات کو سدھارنے کیلئے عملی اقدامات ناگزیر ہو چکے ہیں۔بے یقینی کی کیفیت کی وجہ سے کاروباری حالات میں شدید مندی کا رجحان ہے جس کی وجہ سے ہر طبقہ مشکلات سے دوچار ہے ۔ موجودہ حالات میں عوام میں اس قدر مایوسی پھیلا دی گئی ہے کہ طرح طرح کی افواہیں گردش کر رہی ہیں جس کے ہر شعبے پر منفی اثرات مرتب ہو رہے ہیں اور یہ افواہیں صرف پاکستان کے اندر نہیں بلکہ بیرو ن ممالک بھی سفر کرتی ہیں جس کی وجہ سے غیر ملکی سرمایہ کاری محتاط ہو جاتے ہیں۔

موضوعات:خواجہ حبیب الرحمان