راولپنڈی (این این آئی)پٹرولیم مصنوعات کی قیمتوں میں اضافے کو مسترد کرتے ہیں، حکومت نے قیمتوں میں اضافہ کرکے عام آدمی اور کاروباری طبقے کیلئے مشکلات میں اضافہ کردیا ہے، اس سے مہنگائی کی ایک نئی لہر آئے گی اور عوام کی قوت خرید کم ہونے سے کاروباری سرگرمیاں بہت متاثر ہونگی، ہمیں انتہائی اقدام پر مجبور نہ کیا جائے۔ راولپنڈی چیمبر آف کامرس کے صدر ملک شاہد سلیم نے

ایک بیان میں کہا ہے کہ ہمارا حکومت سے مطالبہ ہے کہ قیمتوں میں اضافہ فوری واپس لیا جائے۔ روپے کی قدر میں کمی کے باعث عام استعمال کی اشیاء ضروریہ کی قیمتوں میں پہلے ہی کئی گنا اضافہ ہو چکا ہے۔ ٹرانسپورٹیشن لاگت میں اضافے سے اشیا کی ترسیل مہنگی ہو جاتی ہے ۔ کاروباری لاگت میں اضافے کا براہ راست اثر برآمدات پرپڑتا ہے۔آئی ایم ایف جانے یا نہ جانے کا فیصلہ فوری کیا جائے ۔ غیر یقینی کی فضا ختم کی جائے۔ ملک شاہد سلیم نے کہا کہ ایف بی آر ، ٹیکس کولیکشن کے نام پر ہراساں نہ کرے۔ انہوں نے کہا کہ ایف بی آر چیئرمین کی واضح ہدایات کے باوجود حکام دکانوں اور دفاتر پر چھاپے مار رہے ہیں ۔ عملہ کمپیوٹر ز اور ریکارڈ اٹھا کر لے جاتا ہے۔ ہمارا مطالبہ ہے۔ ٹیکس نیٹ کو بڑھایا جائے۔ نئے سیکٹرز کو ٹیکسوں کے دائرہ کار میں لایا جائے۔خوف کی فضا ختم کی جائے۔یہ افسوس ناک بات ہے کہ جو ٹیکس دے رہا ہے اسی کو نوٹسز مل رہے ہیں اور اسی کا آڈٹ بھی ہو رہا ہے۔ یہ قابل تشویش بات ہے۔ ٹیکس پیئرز کی عزت نفس کو مجروع کیا جا رہا ہے۔ ہمارا حکومت سے مطالبہ ہے کہ نان فائلرز پر سختی کی جائے۔ملک شاہد سلیم نے کہا کہ ملکی معیشت پہلے ہی غیر یقینی کا شکار ہے ۔ انہوں نے وزارت خزانہ اور ایف بی آر سے مطالبہ کیا کہ ٹیکس کنندگان کو عزت دی جائے اور خوف و ہراس کا ماحول ختم کیا جائے۔ اگر حالات میں بہتری نظر نہ آئی تو راولپنڈی کی تمام تاجر تنظیمیں چیمبر کے ساتھ مل کر اپنے لائحہ عمل کا اعلان کریں گی۔

موضوعات:پٹرولیم مصنوعات