لندن(نیوز ڈیسک) بیلاروس کی ٹینس سٹار وکٹوریا ایزارینکا کا کہنا ہے کہ میچ کے دوران ان کے چِلانے کا معاملہ اب ختم ہونا چاہئے، بہت سے کھلاڑی ٹینس کھیلتے ہوئے چِلاتے ہیں اور اسے کوئی اہم معاملہ نہیں ہے۔ واضح رہے کہ ٹینس میں جب کھلاڑی شاٹ کھیلتے ہیں تو انہیں خاصی توانائی صرف کرنا پڑتی ہے، ایسے میں کھلاڑیوں کے منہ سے بھی زوردار آواز نکلتی ہے۔ خواتین میں وکٹوریا ایزارینکا اور ماریا شراپووا اس حوالے سے بدنام ہیں تو مردوں میں رافیل نڈال اور اینڈی مرے بھی کافی زور دار طریقے سے آوازیں نکالتے ہیں۔ وکٹوریا ایزارینکا ومبلڈن کے کوارٹر فائنل میں سرینا ولیمز سے ہار گئیں۔ میچ کے بعد پریس کانفرنس میں جب ان سے پھر اسی حوالے سے سوال کیا گیا تو وہ غصے میں آ گئیں۔ انہوں نے کہا کہ جب دو پلیئرز کورٹ میں کھیلتے ہیں تو میڈیا کو چاہئے کہ ان کے کھیل پر توجہ دے۔ یہ سوال بہت بار کیا جا چکا ہے اور میں بار بار اس پر جواب دے کر تھک چکی ہیں، ایسے فضول سوالات اب چھوڑ دینے چاہئیں۔ میں پریکٹس سیشن میں تھی جب ساتھ والے کورٹ میں رافیل نڈال پریکٹس کر رہے تھے اور وہ مجھ سے زیادہ زور سے چلا رہے تھے لیکن صرف لڑکیوں کے حوالے سے ہی اس بات کا بتنگڑ بنا دیا جاتاہے ۔