کراچی(این این آئی)وزیراعظم عمران خان دورہ کراچی کے دوران اتحادیوں سے بھی ملاقات کریں تاہم اہم اتحادی متحدہ قومی مومنٹ پاکستان سے کوئی ملاقات طے نہیں ہے۔ذرائع کے مطابق وزیراعظم پیر کو ایک روزہ دورے پر کراچی پہنچیں گے، دورے کے دوران وزیراعظم کنگری ہاؤس جائیں گے جہاں وہ جی ڈی اے کے سربراہ پیر صاحب پگارا سے ملاقات کریں گے۔ملاقات میں جی ڈی اے کے مرکزی رہنما بھی موجود ہونگے۔اس ضمن میں جی ڈی اے کے سیکرٹری اطلات سردار رحیم نے بتایاکہ ملاقات میں سندھ میں ترقیاتی منصوبوں، دیہی سندھ میں

نوجوانوں کو روزگار کی فراہمی سمیت دیگر امور پر تبادلہ خیال کیاجائے گا۔دوسری جانب وزیراعظم کے دورہ کراچی کے دوران اتحادی جماعت ایم کیو ایم کو نظر اندازکردیاگیاہے، شیڈول میں کوئی ملاقات طے نہیں ہے۔ذرائع ایم کیو ایم نے اس ضمن میں تصدیق کرتے ہوئے بتایا ہے کہ وزیر اعظم کی جانب سے ملاقات کا کوئی دعوت نامہ موصول نہیں ہوا ہے۔ذرائع کے مطابق ایم کیو ایم کی خواہش ہے کے وزیر اعظم بہادر آباد تشریف لائیں، ناراض اتحادی جماعت کی قیادت نے اسلام آباد میں ہونے والی ملاقات میں اس خواہش کا اظہار کیا تھا۔

موضوعات:وزیراعظم کا دورہ کراچی