ممبئی(این این آئی) نامور اداکارہ انوشکا شرما کی خوف و دہشت سے بھرپور فلم’’پری‘‘شائقین کو متاثر کرنے میں ناکام رہی ہے۔اداکارہ انوشکا شرما کی گزشتہ روز ریلیز ہونے والی فلم’’پری‘‘ شائقین پر خاص تاثر جمانے میں کامیاب نہ ہوسکی۔ فلم’’پری‘‘ انوشکا شرما کے خوفناک روپ کے باعث ریلیز سے قبل ہی شائقین میں مقبول ہوچکی تھی جب کہ بعض تجزیہ نگاروں نے فلم کو ہٹ قرار دیتے ہوئے کہا تھا کہ اس فلم میں انوشکا نے اب تک کی بہترین اداکاری کی ہے۔

انوشکا شرما بھی اپنی نئی فلم کو لے کر بے حد پرجوش تھیں تاہم ریلیز کے بعد فلم شائقین پر تاثر جمانے میں ناکام رہی ہے۔فلمی تجزیہ نگار ترن آدرش نے فلم ’’پری‘‘کواوسط درجے کی فلم قراردیتے ہوئیٹویٹ کیا ہے کہ فلم ریلیز کے پہلے روز ہولی کے تہوار کے باعث سست روی کاشکار رہی۔ جب کہ بھارت کے جنوبی علاقے میں کئی مقامات پر فلم ریلیز ہی نہیں ہوئی۔ تاہم شام میں لوگوں نے فلم دیکھنے میں دلچسپی دکھائی۔ فلم ریلیز کے پہلے روز 4 کروڑ 36 لاکھ کا بزنس ہی کرسکی ہے۔واضح رہے کہ فلم کی کہانی ایک مسلمان لڑکی رخسانہ کے گرد گھومتی ہے۔ فلم میں پیش کیے جانے والے چند مناظر اور مکالمات میں مسلمانوں کے جذبات مجروح ہونے کے خدشے کے پیش نظر فلم’’پری‘‘کو پاکستان میں نمائش کی اجازت نہیں ملی۔

موضوعات:انوشکا شرما