اسلام آباد(مانیٹرنگ ڈیسک)معروف صحافی طلعت حسین نے اپنے ٹویٹر پیغام میں روزنامہ ایکسپریس کی ایک خبر کا عکس اپنے ٹویٹر پیغام میں جاری کیا ہے۔ روزنامہ ایکسپریس کی اس رپورٹ کے مطابق حیدر آباد میں پاک فوج کی حمایت اور جنرل (ر)راحیل شریف کو صدر مملکت بنانے کے حق میں ریلی نکالی گئی ہے۔ شرکا نے پاک فوج اور ملک میں مارشل لا کے نفاذ کے حق میں زبردست

نعرے بازی کی۔ ریلی میں سید امین شاہ راشدی، صدر ڈاکٹر سکندر علی کیریو، علامہ مدثر عقیق، نور محمد ڈائری، چوہدری عامر، سید احمد رشید، محمد منشیا، بھٹی، رسول بخش سموں، عبدالاحد خان راجپوت و دیگر سمیت حیدر آباد اور سندھ کے مختلف علاقوں سے سینکڑوں افراد شریک ہوئے،ریلی میں خواتین بھی شامل تھیں۔ اس موقع پر امین شاہ راشدی و دیگر مقررین نے خطاب کرتے ہوئے کہا کہ محفوظ پاکستان کیلئے ضروری ہے کہ مضبوط فوج و مضبوط قوم ہو، موجودہ سیاستدانوں کیساتھ چلنے سے ملک محفوظ نہیں ہو گا، احتساب کے بغیر انتخاب قبول نہیں، پہلے کرپٹ لوگوں کا احتساب ہو اور پھر انتخابات ہوں اس کیلئے ضروری ہے جنرل (ر)راحیل شریف کو تمام اختیارات کیساتھ ملک کا صدر بنایا جائے، یہ ملک سیاسی جماعتوں کا نہیں بلکہ عوام کا ہے اور سیاستدانوں نے ملک اور قوم کو نقصان پہنچایا ہے۔ عوام پاک فوج کو پکار رہی ہے۔ پاک فوج عوام کی آواز سنے ملک میں مارشل لا کو عوام خوش آمدید کہیں گے کیونکہ نواز شریف، زرداری و دیگر چور لٹیرے سیاستدانوں نے ملک کا بیڑا غرق کر دیا ہے جو ملک کا دشمن ہے وہ ہمارا بھی دشمن ہے۔ ختم نبوت کے حلف نامے سے چھیڑ چھاڑ کرنے والوں کو کیفر کردار تک پہنچایا جائے اس معاملے میں کسی قسم کی بھی مداخلت برداشت نہیں کرینگے۔

موضوعات:جنرل راحیل حیدر آباد ریلی طلعت حسین مارشل لا