لاہور(آئی این پی)ویسٹ انڈیز کے کرکٹ پلیئر اور پاکستان سپر لیگ (پی ایس ایل)کی چیمپئن ٹیم پشاور زلمی کے کپتان ڈیرن سیمی نے اس امید کا اظہار کیا ہے کہ پی ایس ایل کے تیسرے ایڈیشن میں ان کی ٹیم اپنے ٹائٹل کا بھرپور طریقے سے دفاع کرے گی۔ ایک سپورٹس چینل سے بات کرتے ہوئے ڈیرن سیمی کا کہنا تھا کہ وہ نہ صرف اپنے ٹائٹل کا دفاع کرینگے بلکہ دوبارہ پگڑی بھی اپنے سر پر سجائیں گے۔

جب ان سے پوچھا گیا کہ پی ایس ایل فائنل جیتنے کے بعد جو پگڑی انھیں پہنائی گئی تھی کیا وہ ان کے پاس ہے؟ اس کا جواب دیتے ہوئے ڈیرن سیمی نے بتایا کہ وہ فتح کے فوری بعد ہانگ کانگ روانہ ہو گئے تھے، تاہم وہ پگڑی ابھی تک پشاور زلمی کے مالک جاوید آفریدی کے پاس محفوظ ہے۔ انہوں نے کہا کہ مجھے امید ہے کہ آئندہ سال جب ہم دوبارہ پی ایس ایل تھری کا فائنل جیتیں گے تو وہ پگڑی دوبارہ میرے سر کی زینت بنے گی۔

موضوعات:ڈیرن سیمی