کراچی(اسپورٹس ڈیسک) قومی کرکٹ ٹیم کے سابق کپتان یونس خان نے آسٹریلیا کے خلاف محمد حفیظ کی سنچری کو سینئرز کھلاڑیوں کی جیت قرار دیا ہے۔ایک انٹرویومیں یونس خان نے کہا کہ یہ پاکستان کرکٹ کا المیہ ہے کہ یہاں سینئرز کو شاندار اور با عزت طریقے سے کرکٹ سے علیحدہ ہونے نہیں دیا جاتا۔محمد حفیظ کی 25 ماہ بعد ٹیسٹ ٹیم میں سنچری اننگز کے ساتھ واپسی پر سابق کپتان

کے مطابق محمد حفیظ کو مبارکباد پیش کرتا ہوں اور ان دوستوں کو بھی جنہوں نے انہیں مشکل وقت میں بھرپور انداز میں واپسی پر آمادہ کیا۔یونس خان نے کہا کہ میں نے پاکستان ٹیم کے کئی بڑے کرکٹرز کو روتے ہوئے کرکٹ چھوڑتے دیکھا تھا، اپنا ذکر کرتے ہوئے انہوں نے بتایا کہ گزشتہ سال مارچ میں جب ویسٹ انڈیز کے خلاف اپنا آخری ٹیسٹ کھیل رہا تھا، تب میرے دوستوں کا خیال تھا کہ ریٹائرمنٹ کا فیصلہ غلط ہے لیکن میں اپنے فیصلے پر خوش اور مطمئن تھا کیوں کہ میں عزت سے اس کھیل کو خیر باد کہنا چاہتا تھا۔پاکستان کیلئے ٹیسٹ کرکٹ میں ریکارڈ دس ہزار رنز بنانے والے یونس خان نے کہاکہ پاکستان ٹیم میں نوجوان کھلاڑیوں کی شمولیت خوش آئند ہے البتہ اچھا ہوگا کہ تجربے کار اور سینئرز کرکٹرز کو اچھے انداز میں رخصت کرنے کی روایت کو اپنایا جائے۔یونس خان نے کہاکہ وہ مانتے ہیں کہ کھلاڑی کی کارکردگی میں اتار چڑھاؤ آتا ہے تاہم اچھا ہو کہ سینئرز کے ساتھ بات کی جائے، منصوبے بنائے جائیں تاہم افسوس ایسا نہیں ہوتا۔انہوں نے کہا کہ جب آپ سینئرز کو دیوار سے لگانے کی کوشش کرتے ہیں اور جب ڈوبا ہوا کھلاڑی ابھر کر پرفارم کرتا ہے تو پھر سب منہ چھپاتے نظر آتے ہیں۔

موضوعات:یونس خان