سری لنکا سے سیریز نوجوان کھلاڑیوں کیلئے بہترین موقع ہے ٗرمیز راجہ

  بدھ‬‮ 27 ستمبر‬‮ 2017  |  17:28

اسلام آباد(این این آئی)قومی ٹیم کے سابق کپتان اور مشہور کمنٹیٹر رمیز راجا نے کہا ہے کہ سری لنکن ٹیم میں پہلے جیسا دم خم نہیں رہا اس لیے پاکستان کے پاس بلا کسی خوف و دباؤ نوجوان کھلاڑیوں کی صلاحیتوں کا امتحان لینے کا بہترین موقع ہے۔ایک انٹرویو میں انہوں نے کہا کہ سری لنکن ٹیم اس وقت مشکلات کا شکار ہے ٗ حال ہی میں اسے پہلے زمبابوے کے ہاتھوں ٹیسٹ میچ میںشکست کا سامنا کرنا پڑا اور بعدازاں بھارت نے اسے عبرتناک شکست سے دوچار کیا، گرین شرٹس کے پاس اس پر دباؤ بڑھا کر سیریز جیتنے

کا سنہری موقع ہے تاہم انہوں نے ٹیم کو خبردار کیا کہ انہیں ہدف کے حصول کیلئے جارحانہ حکمت عملی اپنانا ہو گی اور ہماری ٹیم کو چاہیے کہ وہ کسی بھی سیشن میں حریف ٹیم کو سیٹل ہونے کا موقع نہ دیں۔انہوں نے اس سیریز کو نوجوانوں کیلئے بہترین موقع قرار دیتے ہوئے کہا کہ نوجوان کھلاڑیوں کے پاس بھرپور موقع ہے کہ وہ کمزور حریف کے خلاف سیریز میں عمدہ پرفارم کر کے خود کو یونس خان اور مصباح الحق کا متبادل ثابت کریں۔سابق کپتان اور مایہ ناز کمنٹیٹر نے کہا کہ ٹیسٹ ٹیم کی قیادت سرفراز کیلئے چیلنجنگ ہو گی تاہم مجھے پوری امید ہے کہ وہ اپنی لیڈرشپ سکلز کی بدولت اس امتحان میں بھی سرخرو ہوں گے۔یاد رہے کہ مصباح اور یونس کی ریٹائرمنٹ کے بعد یہ گرین شرٹس کی پہلی سیریز ہو گی اور سرفراز احمد پہلی مرتبہ ٹیسٹ کرکٹ میں قومی ٹیم کی قیادت کریں گے۔پاکستان اور سری لنکا کی کرکٹ ٹیموں کے درمیان دو ٹیسٹ میچوں پر مشتمل سیریز کا پہلا ٹیسٹ میچ جمعرات سے ابوظہبی میں شروع ہو گا۔پاکستان اور سری لنکا کے درمیان دوسرا اور آخری ٹیسٹ ڈے اینڈ نائٹ ہو گا جوکہ 6 سے 10 اکتوبر تک دبئی میں کھیلا جائے گا جس کے بعد پانچ ون ڈے اور تین ٹی20 میچوں کی سیریز کھیلی جائے گی۔

موضوعات:

آج کی سب سے زیادہ پڑھی جانے والی خبریں