آکلینڈ(آئی این پی)ورلڈالیون کیلئے نیوزی لینڈ کے جیمزنیشام کانام بھی سامنے آگیا،نیشام کودورہ پاکستان کیلئے1لاکھ ڈالرزکی پیشکش کی گئی ہے۔نیوزی لینڈ میڈیا کے مطابق ورلڈ الیون میں شمولیت کے لیے تین کرکٹرز سے رابطہ کیا گیا تھا جن میں جیمز نیشام،

ڈینئل ویٹوری اور گرانٹ ایلیٹ شامل ہیں۔میڈیا کے مطابق نیشام سے معاملات طے پاچکے ہیں، ان کو بورڈ سے این او سی درکار ہے۔کیوی کرکٹر کو دورہ پاکستان کے لیے ایک لاکھ ڈالر کی پیشکش کی گئی ہے۔نیوزی لینڈکے سابق کپتان ڈینیئل ویٹوری سے بھی رابطہ کیا گیا تھا مگر انہوں نے ورلڈ الیون میں شمولیت سے انکار کردیا ۔اس کے علاوہ آل راونڈر گرانٹ ایلیٹ کو بھی پیشکش کی گئی ہے لیکن انہوں نے تاحال کوئی جواب نہیں دیا ہے۔دوسری جانب پاکستان کا دورہ کرنے والی ورلڈ الیون کرکٹ ٹیم کے مزید نام سامنے آ گئے۔ نئے کھلاڑیوں میں تشار پریرا، ڈیل اسٹین، ڈیویڈ ملر اور براوو شامل ہیں۔ تمام کھلاڑیوں نے پاکستان آکر کھیلنے کی حامی بھرلی ہے۔پاکستان میں بین الاقوامی کرکٹ کے دروازے کھلنے میں مزید آسانیاں پیدا ہوگئی ہیں۔ دورہ پاکستان کرنے والی ورلڈ الیون کرکٹ ٹیم کا حصہ بننے کے لیے مزید 4 مایہ ناز کھلاڑیوں نے اپنی رضامندی ظاہر کردی۔ ان کھلاڑیوں میں تشار پریرا، ڈیل اسٹین، ڈیویڈ ملر اور براوو کے نام سامنے آئے ہیں اور ان کرکٹرز سے بات چیت مثبت انداز میں آگے بڑھ رہی ہے۔حامی بھرنے والے چاروں کرکٹرز اینڈی فلاور کے ساتھ مسلسل رابطے میں ہیں۔ اس سے پہلے ورلڈ الیون کا حصہ بننے کے لیے ہاشم آملہ، عمران طاہر، سمیوئل بدری، پال کولنگ اور فاف ڈوپلیسی کے نام سامنےآ چکے ہیں۔

موضوعات:دورہ پاکستان کرکٹ