اسلام آباد(مانیٹرنگ ڈیسک) چیمپئنز ٹرافی کے پہلے سیمی فائنل میں پاکستان اور انگلینڈ کے مابین کھیلے گئے میچ میں این مورگن وہ بلے باز تھے جن کے آئوٹ ہونے پر میچ کا پانسہ پاکستان کے حق میں مڑ گیا تھا۔ اسی دوران جہاں دنیا بھر میں شائقین کرکٹ اس میچ سے لطف اندوز ہو رہے تھے

وہیں برطانوی سابق کپتان مائیکل وان ، ڈیرن سیمی اور وقار یونس بھی میچ سے بھرپور لطف اندوز ہوتے ہوئے ایک دوسرے کے ساتھ میچ بارے تبصرے کر رہے تھے۔اتفاق سے جب حسن علی نے این مورگن کو آئوٹ کیا تو اس وقت ڈیرن سیمی اپنے موبائل فون کے ذریعے ویڈیو ریکارڈ کر رہے تھے اور اس سے متعلق تینوں کے درمیان بات چیت چل رہی تھی کہ پاکستان کو یہاں وکٹ کی ضرورت ہے۔ ابھی یہ کہا ہی جا رہا تھا کہ حسن علی کی ایک تیز اور گھومتی گیند پر این مورگن وکٹ گنوا بیٹھے۔ان کے آئوٹ ہوتے ہی ڈیرن سیمی نے خوشی سے ایسا اودھم مچایا کہ ساتھ بیٹھے مائیکل وان کی حالت پتلی ہو گئی جبکہ وقار یونس کیلئے اپنی ہنسی چھپانا مشکل ہو گیا۔ اس موقع پر ویڈیو بناتے ڈیرن سیمی نے حسن علی کی پشاور زلمی سے وابستگی کا بھی ذکر کیا اور پاکستانی ٹیم اور پاکستان کیساتھ ان کی اس درجہ عقیدت اورمحبت نے پاکستانیوں کے دل میں ان کی عزت اور بڑھادی ہے۔

موضوعات:ڈیرن سیمی