دبئی(آئی این پی) ٹی ٹوئنٹی ماسٹرز چیمپئن لیگ نے پاکستان سپر لیگ (پی ایس ایل )کے ساتھ تصادم سے توبہ کرلی، گزشتہ برس پاکستانی لیگ کے موقع پر ایونٹ کا انعقاد کرنے سے اسے شدید نقصان ہوا تھا، لہذا اس بار منتظمین بعد میں اپنا ایونٹ منعقد کریں گے۔ایم سی ایل کے چیئرمین ظفر شاہ نے کہاکہ ہم جلد ہی دبئی میں نوجوان کرکٹرز کی تربیت کیلیے کلینک کا انعقاد کرنے والے ہیں، اس میں

سابق پاکستانی کرکٹرز اعجاز احمد اور عبدالرزاق کے ساتھ ویسٹ انڈین عظیم بیٹسمین برائن لارا بھی نوجوانوں کو مشوروں سے نوازیں گے۔ظفر شاہ نے کہا کہ ہم یہ کلینک اس لیے منعقد کررہے ہیں تاکہ لوگوں کو علم رہے کہ ایم سی ایل ختم نہیں ہوئی بلکہ رواں برس بھی منعقد ہوگی، اس وقت ہم مختلف بورڈز کے ساتھ رابطے میں ہیں تاکہ اپنے ایونٹ کیلیے شیڈول میں مناسب جگہ ڈھونڈ سکیں۔ ہم نہیں چاہتے کہ پاکستان سپر لیگ سے تصادم جیسی صورتحال پھر سے سامنے آئے اس لیے ہمارا ایونٹ پی ایس ایل کے فوری بعد منعقد ہوسکتا ہے۔

موضوعات:پاکستان سپر لیگ ماسٹرز چیمپئن لیگ