جوہانسبرگ(نیوز ڈیسک) آسٹریلیا اور نیوزی میں میں کھیلے گئے ورلڈ کپ میں جنوبی افریقی ٹیم کے کپتان کا سیمی فائنل نہ کھیلنے کی دھمکی کا انکشاف ہوا ہے۔ میڈیا رپورٹس کے مطابق پروٹیز کپتان ڈی ویلیئرز سے متعلق یہ تہلکہ خیز انکشاف ورلڈ کپ ختم ہونے کے بعد سامنے آیا ہے۔ رپورٹس میں بتایا گیا ہے کہ ڈی ویلیئرز نے وزیر کھیل کی جانب سے نسلی تعصب کی بنیاد پر ان فارم کھلاڑی کی جگہ انجرڈ پلیئر کو کھلانے پر سیمی فائنل چھوڑنے کی دھمکی دے دی تھی۔ رپورٹس میں دعویٰ کیا گیا ہے کہ سیاہ فام وزیر کھیل کلی مبولا نے ڈویلیئرز پر کائیل ایبٹ کی جگہ فلینڈر کو کھلانے کیلئے دباو ڈالا جس پر کپتان نےسخت غصے میں سیمی فائنل نہ کھیلنے کی دھمکی دے ڈالی تھی۔ واضح رہے کہ ورلڈ کپ میں نیوزی لینڈ اور جنوبی افریقا کے درمیان کھیلا گیا سیمی فائنل کیویز کے نام رہا تھا، پروٹیز کی ہار پر اسٹیڈیم میں جذباتی مناظر دیکھے گئے تھے۔