لاہور( این این آئی، آن لائن)نگران وزیر اعلیٰ عثمان بزدار کی پنجاب اسمبلی میں موجودگی کے باوجود ان کی سکیورٹی اور سکواڈ واپس روانہ ہو گیا ۔ عثمان بزدار گزشتہ روز ہنگامی طو رپر پنجاب اسمبلی پہنچے جہاں انہوں نے گورنر پنجاب عمر سرفراز چیمہ کے فیصلے کے بعد کابینہ کے اراکین کے اجلاس کی صدارت کی تاہم اسی دوران ان کی سکیورٹی

اورسکواڈ پنجاب اسمبلی سے واپس روانہ ہو گیا ۔ عثمان بزدار نے بتایا کہ میں نے سکیورٹی اور سکواڈ کوخود واپس بھجوایا ۔ عثمان بزدار بغیر سکیورٹی کے پنجاب اسمبلی سے روانہ ہوئے۔پنجاب کے محکمہ سروسز اینڈ جنرل ایڈمنسٹریشن کے حکام کے مطابق ہمیں وزیراعلی کا نوٹیفکیشن واپس لینے کا حکم نہیں ملااورپنجاب کابینہ کی بحالی کا نوٹیفیکیشن ہی موجود نہیں تھا۔گورنر کے حکم پر عملدرآمد کا لیٹر موصول ہونے پر نوٹیفکیشن ہوتا ہے، نوٹیفکیشن ایس اینڈ جی اے ڈی کیبنٹ ونگ جاری کرتا ہے۔دوسری جانب مسلم لیگ ن کے رہنما حمزہ شہباز نے وزیراعلیٰ پنجاب کے عہدے کا حلف اٹھا لیا۔وزیر اعلیٰ پنجاب کی تقریب حلف برداری گورنر ہاؤس میں ہوئی جس کے لیے مہمانوں کی بڑی تعداد بھی شریک ہوئی۔تقریب کا باقاعدہ آغاز تلاوت کلام پاک سے ہوا جس کے بعد نعت رسول مقبول ۖ پیش کی گئی۔ اسپیکر قومی اسمبلی راجہ پرویز اشرف نے حمزہ شہباز سے وزیراعلیٰ پنجاب کا حلف لیا۔

وفاقی وزیر داخلہ رانا ثناء اللہ اور مسلم لیگ ن کی مرکزی نائب صدر مریم نواز کے علاوہ شریف فیملی کے افراد بھی حمزہ شہباز کی تقریب حلف برداری دیکھنے کے لیے موجود تھے۔گورنر ہاؤس میں تقریب حلف برداری کے موقع پر کسی بھی قسم کے ناخوشگوار واقعے سے بچنے کے لیے سکیورٹی کے انتہائی سخت انتظامات کیے گئے ہیں اور کسی بھی غیر متعلقہ شخص کو گورنر ہاؤس جانے کی اجازت نہیں ہے۔مسلم لیگ ن کے رکن اسمبلی خواجہ عمران نذیر کا کہنا ہے کہ وزیراعلیٰ پنجاب کی تقریب حلف برداری کے لیے 1000 کے قریب مہمانوں کو مدعو کیا گیا تھا۔ حلف لینے سے پہلے چیف سیکرٹری پنجاب نے لاہور ہائی کورٹ کا فیصلہ پڑھ کر سنا یا ۔

موضوعات:عثمان بزدار