لاہور (مانیٹرنگ ڈیسک) عامر خان کو بالی ووڈ کا مسٹر پرفیکٹ کہا جاتا ہے اور یہ خطاب ایسے ہی نہیں دیا گیا ۔ درحقیقت یہ اداکار اپنے ہر کردار کے لیے ہر جتن کرتے ہیں اور اسے مکمل کرنے میں کوئی کسر نہیں چھوڑتے ۔

گزشتہ سال اپنی بلاک بسٹر فلم دنگل میں اپنے جسمانی وزن میں بہت زیادہ اضافے اور پھر کمی لاکر سب کو حیران کردینے کے بعد اب وہ ایک بار پھر نئی زیرتکمیل فلم ٹھگ آف ہندوستان میں ہر ایک کو حیران کرنے کے لیے تیار ہیں ۔اس فلم کی ہدایات وجے کرشنا اچاریہ دے رہے ہیں جس کی شوٹنگ کا پہلا سپیل مراکش میں مکمل ہوچکا ہے جس میں امیتابھ بچن نے بھی شرکت کی ۔ اس فلم میں عامر خان اور امیتابھ بچن کے ساتھ کترینہ کیف اور ثناء فاطمہ شیخ اہم کرداروں میں نظر آئیں گی ۔ تاہم اب اس فلم کے لیے عامر خان کی سیٹ سے نئی تصاویر سوشل میڈیا پر سامنے آئی ہیں جن میں انہیں پہچاننا لگ بھگ ناممکن ہے ۔لمبے گھنگریالے بال اور پہلے سے زیادہ پتلے جسم کے ساتھ عامر خان نے ایک بار پھر حیران کن حد تک اپنا روپ بدلا ہے ۔ ان تصاویر میں گھنی مونچھیں بھی دیکھی جاسکتی ہیں تاہم سب سے چونکا دینے والی چیز ان کا لباس ہے، جو کہ ان کے ٹھگ ہونے کا عندیہ دیتا ہے ۔ یہ فلم 2018 میں دیوالی کے موقع پر ریلیز کی جائے گی۔

موضوعات:عامر خان