ممبئی(نیوز ڈیسک) اپنی آنے والی فلموں کی کامیابی کے لئے فکر مند بالی ووڈ اداکارہ دپیکا پڈوکون دعا مانگنے خواجہ معین الدین چشتی کے مزار پہنچ گئیں۔ بالی ووڈ کی گلیمرس اداکارہ اجمیر شریف میں صوفی بزرگ کے مزار پہنچیں تو انھوں نے سر پر دوپٹہ اوڑھا ہوا تھا جبکہ نگاہیں نیچی اور چہرے پر دھیمی سی مسکراہٹ سجی تھی۔ سادہ سے کپڑوں میں ملبوس دپیکا کا یہ نیا ہی روپ تھا۔ مداحوں اور سیکیورٹی اہلکاروں میں گھری ہوئی اداکارہ نے مزار پر پھول چڑھائے اور آنے والی فلموں کی کامیابی کی دعائیں مانگیں۔