ملتان(آئی این پی) دکھی انسانیت کی خدمت کے جذبے سے سرشار ملتان کے آئی ٹی کے ہونہار طالب علم نے میڈیسن ایپ ‘ہائے ڈاکٹر’ متعارف کروادی، ایپ کے ذریعے گھر بیٹھے ہی اسپیشلسٹ ڈاکٹر سے مشورہ بھی لیا جاسکتا ہے اور ڈاکٹر کی تجویز کردہ ادویات بھی گھر بیٹھے منگوائی جاسکتی ہیں۔تفصیلات کے مطابق آئی ٹی کے شعبے میں تعلیم حاصل کرنے والے محمد زاہد نے ایک ایسی ایپ متعارف کروائی ہے جو شہریوں کو گھر بیٹھے اسپیشلسٹ ڈاکٹرز سے لنک کرائے گی۔ محمد زاہد

نے میڈیسن ایپ’ہائے ڈاکٹر‘گوگل پلے اسٹور پر بھی متعارف کروا دی گئی ہے جسے ڈاؤن لوڈ کیا جاسکتا ہے۔محمد زاہد کے مطابق اس ایپ کے ذریعے کسی بھی بیماری کے متعلقہ ڈاکٹر کو سرچ کر کے اس سے کنسلٹ کیا جا سکتا ہے اور ڈاکٹر کی تجویز کردہ ادویات کو گھر بیٹھے منگوایا بھی جاسکتا ہے۔ محمد زاہد کا مزید کہنا ہے کہ جلد ہی اس ایپ میں لیبارٹری ٹیسٹ کی سہولت بھی شامل کر دی جائے گی جس کے ذریعے لیبارٹری اسٹاف گھر آ کر ٹیسٹ کے لئے نمونے لے جائے گا۔