سابق آرمی چیف کی ویڈیو ایڈیٹڈ نکلی، عینی شاہد نے تصدیق کردی

پیرس(این این آئی)سابق آرمی چیف جنرل (ر)قمر جاوید باجوہ کی فرانس میں افغان باشندے کی جانب سے بنائی گئی ویڈیو کو ایڈیٹ کرکے سوشل میڈیا پر شیئر کیا گیا۔ فرانسیسی حکام کو مطلع بھی کردیا گیا ہے۔

سابق آرمی چیف قمر جاوید باجوہ فرانس کے سرحدی شہر انیسی سٹی میں اپنے اہلِ خانہ کے ساتھ چھٹیاں گزارنے کیلئے آئے ہوئے تھے۔سیر کے دوران جنرل (ر)قمر جاوید باجوہ ایک عمارت کے باہر بیٹھے تھے کہ وہاں سے گزرے والے افغان نژاد دو افراد نے اچانک انہیں دیکھ کر بے اختیار کہا یہ آرمی چیف قمر جاوید باجوہ ہیں اور فون سے ویڈیو بنانا شروع کردی۔

ان لوگوں نے ویڈیو سوشل میڈیا پر اپلوڈ بھی کی جس میں افغان باشندے غلیظ انداز میں گفتگو کر رہے تھے تاہم عینی شاہد نے ویڈیو سے متعلق انکشاف کیا کہ جب قمر جاوید باجوہ نے پولیس بلانے کا کہا تو کچھ دیر بعدیہ افغان باشندے وہاں سے چلے گئے۔

عینی شاہد نے بتایاکہ اس ویڈیو میں جو غلیظ باتیں وائرل کی گئیں وہ بعد میں ڈب کی گئی ہیں۔ ذرائع کے مطابق پاکستانی سفارت خانہ نے اس سلسلہ میں فرانسیسی حکام کو بھی مطلع کردیا ہے۔