کوئٹہ(مانیٹرنگ + این این آئی)پاکستان پیپلز پارٹی کے چیئرمین بلاول بھٹو زرداری کوئٹہ میں ہزارہ برادری کے شہداء کے لواحقین سے خطاب کے دوران آبدیدہ ہوگئے۔جمعرات کو ہزارہ برادری کے شہدا کے لواحقین سے خطاب کے دوران بلاول بھٹو زرداری آبدیدہ ہوگئے اور کچھ دیرکیلئے تقریر کرتے ہوئے رکے جس کے بعدانہوں نے اپنا

خطاب مختصر کیا۔ انہوں نے کہا کہ پاکستان میں سب کچھ مہنگا لیکن صرف خون سستا ہے، بلاول بھٹو نے کہا کہ جب بھی کوئٹہ آتے ہیں، غمی میں ہی شریک ہونے کے لئے آتے ہیں، انہوں نے کاہ کہ افسوس کہ ہمیں اب شہیدوں کے لیے بھی احتجاج کرنا پڑتا ہے۔ دھرنے کے شرکاء سے خطاب کرتے ہوئے بلاول بھٹو نے کہا کہ سانحہ مچھ کا واقعہ بہت افسوسناک اورقابل مذمت ہے۔انہوں نے کہا کہ پورا پاکستان ہزارہ بھائیوں کے ساتھ ہے۔انہوں نے کہا کہ میں بھی شہیدوں کے خاندان سے تعلق رکھتا ہوں آپ کا دکھ میں سمجھ سکتا ہوں۔ دوسری جانب پاکستان پیپلز پارٹی کے سیکرٹری جنرل نیئر حسین بخاری نے کہاہے کہ بلوچستان کی ہزارہ برادری کے مقتولین کے لواحقین کے مطالبات تسلیم ہونے چاہئیں،،پیپلز پارٹی چاہتی ہے آپ کے خاندانوں کو قانون کے مطابق انصاف ملے۔ جمعرات کو یہاں ہزارہ برادری کے احتجاجی کیمپ سے خطاب کرتے ہوئے انہوں نے کہاکہ بلوچستان کی ہزارہ برادری کے مقتولین کے لواحقین کے مطالبات تسلیم ہونے چاہئیں۔ انہوں نے کہاکہ پیپلز پارٹی کے وزیراعظم ہزارہ برادری سے یکجہتی کیلئے کوئٹہ دھرنے میں بیٹھے رہے۔ انہوں نے کہاکہ عمران خان کے پاؤں میں کیا مہندی لگی ہوئی ہے،لوگوں کے گھر اجڑ گئے ہیں۔ انہوں نے کہاکہ شہریوں کے خاندان برباد ہوگئے ہیں،پیپلز پارٹی چاہتی ہے

آپ کے خاندانوں کو قانون کے مطابق انصاف ملے۔ انہوں نے کہاکہ حکمرانوں کی صرف طفل تسلیاں ہیں،ایک ایسے شخص کو کوئٹہ بھجوایا گیا جسکی ناک تلے 22سالہ نوجوان قتل کر دیا گیا۔ انہوں نے کہاکہ پیپلز پارٹی آپ کے تمام مطالبات کی حمایت کرتی ہے،پیپلز پارٹی آپ کے شانہ بشانہ ہے۔

موضوعات:بلاول بھٹو زرداری