کراچی(این این آئی) سندھ کے وزیراطلاعات وبلدیات سید ناصر حسین شاہ نے کہاہے کہ خان صاحب اوران کی ٹیم نے کئی عالمی اعزاز اپنے نام کرلئے ہیں،پہلے100دن میں اے ٹی ایمز کو ریکارڈ فائدہ پہنچانے کا ورلڈکپ پی ٹی آئی نے جیت لیا۔وزیر

اطلاعات سندھ سید ناصر حسین شاہ نے جاری بیان میں کہاکہ سستی چینی ایکسپورٹ کرکے مہنگی چینی امپورٹ کرنے کا گورننس ماڈل خان صاحب کا ہے۔انہوں نے کہا کہ پہلے 100 دن میں اے ٹی ایمز کو ریکارڈ فائدہ پہنچانے کا ورلڈکپ پی ٹی آئی نے جیت لیا۔ حوروں والے انجکشن کا بتاکر ادویات مہنگی کرنے میں سلیکٹیڈ بازی لے گئے۔ ڈرائیوری ڈپلومیسی کے ذریعے اپنے ملک کو دنیا میں تنہا کرانے میں شاہ محمود قریشی سرفہرست رہے۔انہوں نے کہاکہ ہر وزارت میں انسانوں کی موت کا سبب بننے کا عالمی اعزاز شیخ رشید نے برقرار رکھا۔ باتیں بنانے کے عالمی مقابلے میں شبلی فراز اور فواد چوہدری کی جوڑی کامیاب رہی۔ناصر شاہ نے کہا کہ مرادسعید نے تین منفرد عالمی ٹائٹل اپنے نام کیے۔ سب سے زیادہ جوتے اٹھانے کا عالمی مقابلہ فیصل واوڈا نے جیت لیا۔ مسخرہ پن کا عالمی ایوارڈ شہباز گل نے حاصل کیا۔ احتساب کی جعلی ٹرک کی بتی کے پیچھے لگنے میں شہزاد اکبر سب پر بازی لے گئے۔

موضوعات:سید ناصر حسین شاہ