لاہو ر(این این آئی، آن لائن) مسلم لیگ(ن)پنجاب کی سیکرٹری اطلاعات عظمی بخاری نے کہا ہے کہ چوہدری سرور ہمارے پیج کی نہیں اپنے صفحوں کی فکرکریں،ایک پیج کے دعوے کرنے والوں کے صفحے الگ الگ ہو چکے ہیں۔عظمی بخاری نے گورنر چوہدری سرور کے بیان پر

ردعمل کااظہار کرتے ہوئے کہاکہ سرور صاحب اگر پی ڈی ایم کی تحریک ناکام ہورہی ہے تو آپ ساہیوال سے الیکشن لڑنے کی تیاریاں کیوں کررہے ہیں؟،عمران خان کے پنجرے سے بہت سے پرندے اڑان بھرنے کو تیار بیٹھے ہیں،بہت جلد لال،پیلے اور نیلے گھوڑے عمران خان کو تنہا چھوڑنے والے ہیں۔ انہوں نے کہاکہ موسمی پرندے نئے ٹھکانے تلاش کرنے کیلئے ہاتھ پائوں مار رہے ہیں۔چوہدری سرور پی ڈی ایم کی بجائے اپنے اتحادیوں کی فکر کریں۔حکومت کے اتحادی کسی لمحے بھی علیحدگی کا اعلان کرسکتے ہیں۔حکومتی صفوں میں موجود کچھ باضمیر لوگ حکومتی مافیا سے خود تنگ آچکے ہیں۔دریں اثنا گورنر پنجاب چوہدری محمد سرور نے کہا ہے کہ مایوس پی ڈی ایم کو اب خود سمجھ نہیں آرہی ہے وہ کیا کریں۔ پی ڈی ایم جماعتیں ایک پیج پر نہیں بلکہ سب کا اپنا اپنا پیج ہے۔ لاہور میں وزیر اعظم کے معاون خصوصی ندیم افضل چن نے گورنر پنجاب چوہدری محمد سرور سے ملاقات کی جس میں ملک کی موجودہ سیاسی صورت

حال اور دیگر امور پر تبادلہ خیال کیا گیا۔ بعدازاں میڈیا سے گفتگو کرتے ہوئے چوہدری سرور نے کہا کہ اپوزیشن کی احتجاجی سیاست کا ایجنڈا انتشار اور فساد کے سوا کچھ نہیں، پی ڈی ایم کے جلسے کورونا پھیلاؤ مہم کا حصہ بن رہے ہیں۔ پی ڈی ایم جماعتیں ایک پیج پر نہیں بلکہ سب کا

اپنا اپنا پیج ہے، حکومت اپنے اصولی موقف سے کسی صورت پیچھے نہیں ہٹے گی، حکومت آئینی مدت کا آخری منٹ بھی پورا کر کے ہی جائے گی۔ اپوزیشن کے اے سے زیڈ تک سارے پلان ناکام ہوں گے، پی ڈی ایم بس دیکھتی جائے سینیٹ کے انتخابات بھی ہوں گے اور اس میں تحریک انصاف واضح کامیابی بھی حاصل کرے گی۔ ندیم افضل چن کا کہنا تھا کہ سیاسی مخالفین کا ملک کو عدم استحکام کا شکار کرنے کا ایجنڈہ ناکام ہی ہوگا، حکومت کو اپوزیشن کے احتجاج سے کوئی خطرہ نہیں آئینی مدت پوری کر یں گے۔

موضوعات:عظمیٰ بخاری