لاہور(این این آئی) فیڈرل بورڈ آف ریونیو نے لاہور میں سکول، کالجز اور یونیورسٹیوں کی 5لاکھ سے 30لاکھ روپے تک سالانہ فیسیں ادا کرنے والے غیر رجسٹرڈ 4900 افراد کا سراغ لگالیا،ان افراد کے نام، قومی شناختی کارڈز اور گھروں کے ایڈریس حاصل کرلیے گئے جن سے پانچ سال کے گوشوارے، اثاثہ جات اور ذرائع آمدن کی تفصیلات طلب کی جائیں گی۔ذرائع کے مطابق ڈائریکٹر جنرل سپیشل انیشیئیٹو آمنہ حسن نے 5 سے 30 لاکھ روپے سالانہ فیس ادا کرنے والے غیررجسٹرڈ 4900کروڑ پتی افراد کا ریکارڈ مرتب کر کے

ایف بی آر ہیڈ کوارٹر کو بھجوا دیا ہے۔بتایاگیا ہے کہ غیر رجسٹرڈ کروڑ پتی افراد کو نوٹس جاری کر کے پانچ سال کے گوشوارے، اثاثہ جات اور ذرائع آمدن کی تفصیلات طلب کی جائیں گی، ٹیکس نیٹ میں شامل ہوئے بغیر فیسوں کی مد میں لاکھوں روپے کی ادائیگی کرنے والے والدین کو بھاری بھر کم جرمانے عائد کر کے ٹیکس وصولی کی جائے گی۔ذرائع نے یہ بھی بتایا ہے کہ ٹیکس نیٹ میں موجود کم آمدن ظاہر کرنے والوں کا بھی ریکارڈ مرتب کیا گیا ہے جو آمدن سے زائد بھاری فیسیں ادا کر رہے ہیں۔

موضوعات:فیڈرل بورڈ آف ریونیو