اسلام آباد (این این آئی)بلوچستان رہنما سینیٹر عثمان کاکڑ اور میر حاصل بزنجو نے کہاہے کہ پشتون تحفظ موومنٹ فاٹا میں ظلم زیادتی کے نتیجے میں بنی، معاملے پر وزیر داخلہ سینٹ میں آکر بیان دیں اور چیئر مین سینٹ منظور پشتین کی رہائی کے لئے رولنگ دیں۔پیر کو نکتہ اعتراض پر سینیٹر عثمان کاکڑ نے کہاکہ رات کو ایک بجے پشاور سے منظور ہشتین کو گرفتار کیا اور ڈی آئی خان لے گئے۔

انہوں نے کہاکہ منظور پشتین کے ساتھ پانچ لوگوں کو بھی گرفتار کیا گیا۔ انہوں نے کہاکہ پی ٹی ایم کے کارکنان کو گرفتار کیا جارہا ہے،حکومت پشتونوں کو اشتعال دے رہی ہے۔ انہوں نے کہاکہ اس ملک میں ہر بڑے شخص پر مقدمات ہیں اس کی آڑ میں پی ٹی ایم کارکنان کی گرفتاری درست نہیں،منظور پشتون کو فوری رہا کیا جائے۔میر حاصل بزنجو نے کہاکہ پشتون تحفظ موومنٹ فاٹا میں ظلم زیادتی کے نتیجے میں بنی،ہمارے ملک میں کسی مثبت چیز کو مثبت نہیں سمجھا جاتا۔ انہوں نے کہاکہ کہنے کو بہت الزامات لگے تاہم آج تک پی ٹی ایم پر ایک ٹھوس الزام نہیں ہے،ان کا مطالبہ تھا چیک پوسٹ ختم کرو، بے گھر لوگوں کو معاوضہ دو،محسن داوڑ اور علی وزیر کو بلا وجہ گرفتار کیا گیا۔ انہوں نے کہاکہ چیئرمین سینیٹ رولنگ دیں کہ منظور پشتین کو رہا کیا جائے،وزیر داخلہ آکر اس پر بیان دیں۔

موضوعات:عثمان کاکڑ اور میر حاصل بزنجو