اسلام آباد (مانیٹرنگ ڈیسک) آصف زرداری کی دبئی کے بعد نیویارک میں بھی مبینہ پراپرٹی کا انکشاف ۔ تفصیلات کے مطابق معروف صحافی ارشد شریف نے نجی ٹی وی پروگرام میں گفتگو کرتے ہوئے انکشاف کیا ہے کہ دبئی کے علاوہ آصف زرداری کی امریکہ کے شہر نیویارک میں بھی مبینہ طور پر پراپرٹی ہے اور دنیا کے مہنگے ترین شہر نیویارک میں آصف زرداری کا ایک اپارٹمنٹ ہے۔

زرداری کی اس مبینہ جائیداد کی دستاویزات بھی ہمارے پاس ہیں۔نیویارک کا یہ اپارٹمنٹ آصف زرداری کے نام پر ہے جو کہ 2007میں خریدا گیا تھا۔ دستاویزات کے مطابق اپارٹمنٹ کی فروخت کے معاہدے ’سیل کنٹریکٹ ‘کی تاریخ دستاویزات میں 16نومبر 2006درج ہے جبکہ یہ اپارٹمنٹ آصف زرداری کے نام 12جون 2007کو ٹرانسفر ہوا اور اس کی قیمت 5لاکھ 30ہزار ڈالر بنتی ہے۔ دوسری جانب معروف صحافی عمران یعقوب نے آصف زرداری کے حوالے سے خبر دیتے ہوئے بتایا ہے کہ ممکنہ طور پر پیپلزپارٹی کے کو چیئرمین کو بینظیر بھٹو کی برسی کے بعد گرفتار کر لیا جائیگا۔ واضح رہے کہ آصف زرداری کی مشرف دور میں رہائی کے بعد وہ ابو ظہبی میں مقیم اپنی اہلیہ اور پاکستان کی سابق خاتون وزیراعظم محترمہ بینظیر بھٹو کے پاس چلے گئے تھے اور جب بینظیر بھٹو نے پاکستان آنے کا فیصلہ کیا تو آصف زرداری اپنے علاج کے سلسلے میں امریکہ میں مقیم رہے اور اس دوران ان کے نیویارک میں ایک اپارٹمنٹ میں اپنے کتوں کے ساتھ مقیم رہنے کا ذکر اس وقت کی میڈیا رپورٹس میں بھی سامنے آیا تھا۔ اس وقت بعض صحافتی اور سیاسی حلقوں میں یہ بات بھی گردش کرتی رہی ہے کہ بینظیر بھٹو اور آصف زرداری کے درمیان علیحدگی ہو چکی ہے اور آصف زرداری نیویارک منتقل ہو چکے ہیں تاہم جب بینظیر بھٹو نے وطن واپسی کا فیصلہ کیا تو اس وقت یہ افواہیں آصف زرداری کو ابوظہبی سے پاکستان آنیوالی بینظیر بھٹو کے ساتھ دیکھ کر دم توڑ گئی تھیں۔

موضوعات:ارشد شریف آصف زرداری نیویارک پراپرٹی