نئی دہلی (مانیٹرنگ ڈیسک)کرتارپور راہداری اور پاکستان کی طرف سے بار بار امن اور مذاکرات کی پیش کش بھارتی فوجی سربراہ کو ہضم نہ ہو سکی، جنرل بپن راوت نے ایل او سی پر ڈرونز کے استعمال اور پاکستان کے خلاف ہائبرڈ وار اور سائبر حملوں کا اعلان کر دیا۔ تفصیلات کے مطابق بھارتی آرمی چیف جنرل بپن راوت پاکستان کے خلاف گاہے بگاہے ہرزہ سرائی کرتا رہتا ہے ،

پاکستان میں سرجیکل اسٹرائیک کا جھوٹا دعویٰ بھی جنرل بپن راوت نے ہی کیا تھا جو بعد میں جھوٹا قرار دے دیا گیا اور بھارت کو پوری دنیا کے سامنے شرمندگی کا سامنا کرنا پڑا تھا تاہم ابھی اس پر بھارتی سبکی کم نہ ہوئی تھی کہ جنرل بپن راوت ایک بار پھر میدان میں آگیا ہے اور اس نے مقبوضہ جموں اور ایل او سی کی صورتحال کنٹرول کرنے کیلئے ڈرونز کے استعمال کا عندیہ دیدیا ہے۔ جنرل بپن راوت کا کہنا تھاکہ امریکہ نے ڈرونز کے استعمال سے بہترین نتائج حاصل کیے جبکہ اسرائیل بھی دہشتگردوں کی مزاحمت ڈرونز سے کنٹرول کرتا ہے۔بھارتی آرمی چیف نے پاکستا ن کے خلاف ہائبرڈ اور سائبر جنگ شروع کرنے کا بھی عندیہ دیتے ہوئےکہا ہے کہ پاکستان کے خلاف جھوٹی خبریں پھیلانا ہوں گی اور سائبر حملے بھی کرنا ہوں گے۔اس حوالے سے بھارتی آرمی چیف نے اپنی حکومت کو پاکستان کے خلاف جھوٹے اور منفی پروپیگنڈہ مہم یعنی ہائبرڈ وارمیں تیزی لانے کی تجویز دی ہے۔واضح رہے کہ اس سے قبل بھی بھارتی فوج ایل او سی پر ڈرونز کا استعمال کرتی چلی آرہی ہے تاہم اب اچانک ایل او سی پر ڈرونز کے استعمال اور اس پر امریکہ اور اسرائیل کی مثال سے یہ بات نظر آرہی ہے کہ بھارت اس بار ایل او سی اور مقبوضہ جموں میں کشمیری مجاہدین کی سرگرمیوں اور پاک فوج کے خلاف حملہ آور مسلح ڈرونز اڑانے کا ارادہ رکھتا ہے۔

موضوعات:بھارتی آرمی چیف جنرل بپن راوت