ڈیرہ غازی خان(آن لائن) ڈیرہ غازی خان، ملتان روڈ پرتیز رفتار دو مسافر بسوں میں تصادم‘ 19افراد جاں بحق35 زخمی، ریسکیو 1122نے زخمیوں اور مرنے والوں کو ٹیچنگ ہسپتال منتقل کردیا‘ المناک حادثہ موٹرسائیکل سوار کو بچاتے ہوئے پیش آیا، مسافروں کو بسوں کی باڈی کاٹ کر نکالا گیا‘ ٹیچنگ ہسپتال میں ایمرجنسی نافذ، شدید زخمیوں کو نشتر ہسپتال ملتان ریفر کردیا گیا‘ وقوعہ کی اطلاع ملتے ہی ضلعی انتظامیہ ہسپتال پہنچ گئی‘ امدادی کاموں میں رینجرز کے جوانوں نے بھی حصہ لیا‘ ہسپتال میں خون کے عطیات دینے والے شہریوں کی لائنیں لگ گئیں‘

جائے وقوعہ پر زخمی مسافروں کا سامان چوری، افسوسناک واقعہ، دریں اثناء وزیراعلیٰ پنجاب سردار عثمان بزدار نے ڈیرہ غازی خان کے قریب غازی گھاٹ میں ٹریفک حادثہ پر قیمتی انسانی جانوں کے ضیاع پر دکھ اور افسوس کا اظہارکیا ہے۔ وزیر اعلیٰ نے کمشنر اور آر پی او کو فوری طور پر موقع پر پہنچنے کی ہدایت کی ہے۔ انہوں نے کہاکہ حادثہ میں زخمی ہونے والے افراد کو بہترین طبی سہولیات فراہم کی جائیں۔ وزیر اعلیٰ نے حادثہ میں جاں بحق ہونے والے افراد کے لواحقین سے دلی افسوس کا اظہار کیا ہے۔انہوں نے حادثے کے بارے رپورٹ طلب کر لی ہے۔

موضوعات:دو مسافر بسوں میں تصادم