اسلام آباد (مانیٹرنگ ڈیسک) وفاقی وزیر خزانہ اسد عمر کے بھائی اور لیگی رہنما اور سابق گورنر سندھ زبیر عمر نے کہا کہ آج حکومت نے فرخ سلیم کو معیشت کا ترجمان لگا دیا ہے اور اس کے بارے میں اسد عمر کہا کرتے تھے کہ یہ ’’جانوروں کے ڈاکٹر‘‘ ہوں گے لیکن معیشت کے تو نہیں ہیں اور آج آپ نے انہیں اکانومی پر رکھ دیا ہے۔ اسد عمر کے بھائی سابق گورنر سندھ زبیر عمر نے کہا کہ آپ نے منی لانڈرنگ روکنی ہے تو آپ روکیں،

اس کا معیشت کی منصوبہ بندی سے کچھ لینا دینا نہیں ہے۔ دوسری جانب مسلم لیگ (ن) کے رہنما وسابق گورنر سندھ محمد زبیر عمر نے وزیر خزانہ اسد عمر کے بیان پر کہا ہے کہ پاکستان تحریک انصاف نے اسحاق ڈار کے آئی ایم ایف کے پاس جانے کے فیصلے کو درست مان لیا ہے ،یہ آہستہ آہستہ مسلم لیگ (ن) کے تمام معاشی فیصلوں کو سراہیں گے اور ہم دیکھیں گے ۔ہفتہ کو سماجی رابطوں کی ویب سائٹ ٹوئٹر پر مسلم لیگ (ن) کے مرکزی رہنما محمد زبیر نے وزیرخزانہ اور اپنے بھائی اسد عمر کے میڈیا سے گفتگو کے دوران (ن) لیگ کے معاشی فیصلوں کو سراہے جانے کے بیان پر اپنے ردعمل میں کہا کہ پاکستان تحریک انصاف کی جانب سے یہ پہلا اعتراف ہے آہستہ آہستہ یہ مسلم لیگ (ن) کے تمام معاشی واقتصادی فیصلوں کو سراہیں گے ۔انہوں نے کہا کہ ہم یہ سب دیکھیں گے ۔ واضح رہے کہ وزیر خزانہ اسد عمر نے میڈیا سے گفتگو میں کہا تھا کہ مسلم لیگ (ن) کے رہنما اور سابق وزیر خزانہ اسحاق ڈار کا آئی ایم ایف کے پاس جانے میں کوئی قصور نہیں ۔ یہاں یہ امر بھی قابل ذکر ہے کہ محمد زبیر عمر اور اسد عمر سگے بھائی ہیں اور دونوں کا ایک دوسرے کی مخالف جماعتوں سے تعلق ہے ۔ محمد زبیر عمر بڑے بھائی ہیں اور وہ مسلم لیگ (ن) کے مرکزی رہنما ہیں ۔وہ (ن) لیگ کے سابق دور حکومت میں سندھ کے گورنر بھی رہے ہیں ۔دوسری جانب چھوٹے بھائی اسد عمر کا تعلق موجودہ حکمران جماعت پاکستان تحریک انصاف سے ہے اور وہ اس وقت وزیر خزانہ ہیں ۔

موضوعات:عمران خان