اسلام آباد(آئی این پی )پاکستان تحریک انصاف کے سینئر رہنما اسد عمر نے کہا ہے کہ آئی ایم ایف کے پاس نہ جانا ہماری ترجیحات میں شامل ہوسکتا ہے، ملکی معیشت کی موجودہ حالت کو بھی دیکھنا ہوگا، ملک پر قرضہ تیزی سے بڑھ رہا ہے، عمران خان ملکی وسائل سے بخوبی آگاہ ہیں، زرمبادلہ کے ذخائر 10ارب ڈالر ہیں، دہشتگردی کی فنڈنگ روکنا ہماری ذمہ داری ہے، پی ٹی آئی میں آکر کوئی جرائم پیشہ چھپ گیا تو سمجھو ہم فیل ہوگئے،

سیکیورٹی خدشات کے باعث عمران خان کا بنی گالہ میں قیام ممکن نہیں ہے، وفاق میں پی ٹی آئی 172ہدف سے آگے جاچکی ہے۔ وہ پیر کو نجی ٹی وی کو انٹرویو دے رہے تھے۔ اسد عمر نے کہا کہ عمران خان کو ملکی مسائل سے بخوبی آگاہ ہیں۔ آئی ایم ایف کے پاس نہ جانا ہماری ترجیحات میں شامل ہوسکتا ہے۔ اس وقت ملکی معیشت کی حالت کو بھی دیکھنا ہوگا، ملک پر قرضہ تیزی سے بڑھ رہا ہے، معیشت کی بہتری کیلئے تمام آپریشنز زیر غور ہیں۔ انہوں نے کہا کہ بیرون ملک مقیم پاکستانیوں کو سرمایہ کاری میں مشکلات ہیں، بیرون مقیم پاکستانی پیسہ اپنے ملک میں لانے کیلئے تیار رہیں۔ اگر کوئی جرائم پیشہ فرد تحریک انصاف کی چھتری تلے چھپ کر بچ نکلا تو سمجھو ہم فیل ہوگئے۔ رہنما پی ٹی آئی نے کہا کہ بیرون ملک مقیم پاکستانیوں کو منافع بخش پیکج دینگے۔ دہشتگردوں کی فنڈنگ روکنا ہماری ذمہ داری ہے۔ وزیراعلیٰ کی نامزدگی کے بعد وزارتوں کے فیصلے ہوں گے، وزیراعظم کی تقریب حلف برداری 15اگست کو ہوسکتی ہے۔ سیکیورٹی خدشات کے باعث ڈی چوک پر حلف برداری کی تقریب ممکن نہیں ہے۔ انہوں نے کہا کہ 2سے 3روز میں فیصلے فائنل ہوسکتے ہیں۔ سیکیورٹی خدشات کے باعث بنی گالا میں بھی عمران خان کا قیام ممکن نہیں ہے اور وہ وزیراعظم ہاؤس میں بھی قیام نہیں کرینگے۔پنجاب میں وزارت اعلیٰ کیلئے زیادہ آپشنز ہیں۔ ہوسکتا ہے وزیراعلیٰ خیبر پختونخوا کی نامزدگی کا اعلان (آج) ہوجائے۔ اسد عمر نے کہا کہ وفاق میں پی ٹی آئی 172کے ہدف سے آگے جا چکی ہے۔ ہم ایف بی آر میں شفافیت یقینی بنائیں گے۔ نظام میں جتنی شفافیت آئے گی جرم کرنا اتنا مشکل ہوجائے گا۔ انہوں نے کہا کہ عمران خان اسمبلی میں وزیراعظم کے اوپر بھی سوال وجواب کا سیشن ہونا چاہیے۔

موضوعات:اسد عمر