اسلام آباد(مانیٹرنگ ڈیسک )میں ایک مہذب خاتون ہوں۔ ابھی اپنا منہ نہیں کھول رہی لیکن جو کچھ میں نے برداشت کیا اگر اس کے بجائے میں نے اپنا منہ کھولا تو یہ آپ کے لیے اچھا نہیں ہو گا ۔مسلم لیگ ن کی رہنما ماروی میمن نے سوشل میڈ یا پر لیگی ٹرولز کو خبر دار کردیا ۔اس ٹوئٹ پر خرم اعوان نامی شخص نے سوال کیا ”کیا برداشت کیا ہے تم نے ؟اس بار ٹکٹ نہیں ملی ؟“

جواباً ماروی میمن نے کہا کہ میں نے ٹکٹ کے لیے اپلائی نہیں کیا کیونکہ میں اس دہری پالیسی اور گڈ کوپ ،بیڈ کوپ اور اداروں سے مخالفت کی پالیسی سے اتفاق نہیں کرتی ۔ان کا کہنا تھا کہ اس کے علاوہ پارٹی کے اندر بھی بہت سے مسائل ہیں جو صحیح وقت آنے پر بتاﺅں گی ۔عادل نامی شخص نے کہا کہ ن لیگ کے سپورٹرز کی اکثریت نواز شریف اور مریم نواز کے بیانیے سے اتفاق کرتی ہے ،ا گر آپ کا اختلاف ہے تو آپ پارٹی چھوڑ دیں ۔اس پر جواب دیتے ہوئے ماروی میمن نے کہا کہ ن لیگ کے سپورٹرز کی اکثریت نواز شریف کے بیانیے سے اتفاق نہیں کرتی ،البتہ 25جولائی کو بیانیے کا ٹیسٹ ہو جائے گا ۔ماجد علی نے کہا کہ چوہدری نثار نہ بنیں ،جو کہنا ہے کہہ دیں ،چوہدری نثار کی طرح وارننگ جاری نہ کریں ۔میاں عالمگیر نے کہا کہ مسلم لیگ ن سے غلطیاں ہوئی ہیں ،آپ جیسے لوگوں کی جگہ نظریاتی ورکرز کو آگے لانا چاہیے تھا ۔واضح رہے کہ ماروی میمن پہلے بھی لیگی قیادت کے خلاف بول چکی ہیں انہوں نے اپنے ایک بیان میں کہا تھا کہ پارٹی میں صرف جی حضوری چل رہی ہے، خوشامدی ٹولہ چھایا ہوا ہے، جس کی وجہ سے پارٹی ٹوٹ پھوٹ کا شکار ہو گئی ہے۔

موضوعات:ماروی میمن