اسلام آباد (مانیٹرنگ ڈیسک)وزیراعظم پاکستان شاہد خاقان عباسی کی نجی دورے کے دوران امریکی ائیرپورٹ پر ہتک آمیز سلوک کی ویڈیو کے باعث وہ بھارت میں بھی مذاق بن گئے ہیں۔ تفصیلات کے مطابق چند روز قبل وزیراعظم پاکستان شاہد خاقان عباسی امریکہ نجی دورے پر گئے جہاں ایک ائیرپورٹ پر انہیں سخت سکیورٹی مراحل سے گزرنا پڑا۔ اس دوران انہیں جوتے اتارنے

سمیت کپڑوں سے محروم کر کے بھی سکیننگ سے گزارا گیا۔ شاہد خاقان عباسی جب تلاشی اور سکیننگ کے مرحلے سے گزر کر کائونٹر پر دوبارہ لباس پہن رہے تھے تو اس دوران ان کی موبائل کیمرے سے ویڈیو بنا لی گئی جو کہ انٹرنیٹ پر تیزی سے وائرل ہو رہی ہے۔ بھارتی میڈیا نے وزیر اعظم شاہد خاقان عباسی کی ویڈیو کو بڑھا چڑھا کر اپنے ٹی وی پر نشر کیا اور کہا کہ اس ویڈیو میں آپ جس شخص کو دیکھ رہے ہیں یہ کوئی عام آدمی نہیں بلکہ وزیر اعظم پاکستان ہیں۔پاکستان کے معروف صحافی عامر متین نے وزیراعظم پاکستان کی اس ویڈیو پر تبصرہ کرتے ہوئے کہا ہے کہ شاہد خاقان عباسی پاکستان کیلئے بے عزتی کا باعث بنے ، بھارتی میڈیا ان کی اس ویڈیو پر جو الفاظ استعمال کر رہا ہے وہ بولنے کے قابل نہیں۔ اتنے بڑے عہدے پر فائز ایک شخص ملک سے باہر جاتا ہے تو اس وقت وہ دراصل ملک کا نمائندہ ہوتا ہے اور اس کی عزت ملک کی عزت سے جڑی ہوتی ہے۔واضح رہے کہ وزیراعظم شاہد خاقان عباسی کی بطور وزیراعظم نجی دورے کے دوران ایسی شرمناک ویڈیو سامنے آنے پر ان پر سوشل میڈیا اورعوامی حلقوں میں شدید تنقید کا نشانہ بنایا جا رہا ہے۔ سوشل میڈیا صارفین کا کہنا ہے کہ وزیراعظم شاہد خاقان عباسی نے ملک کی عزت کا جنازہ نکال دیا ہے۔ پاکستان کے وزیراعظم کے ساتھ امریکی ائیرپورٹ پر ایسا سلوک دراصل 20کروڑ سے زائد پاکستانیوں کی بے عزتی اور ذلت ہے۔

موضوعات:امریکی ائیرپورٹ شرمناک سلوک بھارتی میڈیا وزیراعظم شاہد خاقان عباسی