اسلام آباد،پشاور(مانیٹرنگ ڈیسک )چین کے سفیر ژاﺅ جنگ نے کہا ہے کہ پاکستان کی بجلی کی مجموعی طلب 2020تک مکمل کرلیں گے ۔نجی ٹی وی کے مطابق چینی سفیر نے کہا کہ سی پیک پاکستان اور چین میں تعاون کی نئی معراج ہے ، راہداری منصوبے کے بعد پاکستان میں بجلی کی پیدا وار بہتر ہوئی ۔ان کا کہنا تھا کہ نجی کمپنیاں اور سرمایہ کار سی پیک میں اپنا حصہ ڈال رہے ہیں ،6پاور پلانٹس کامیابی سے مکمل کرچکے ہیں ۔
چینی سفیر نے مزید کہا کہ ہمیں تعاون کے فروغ کے عمل میں ایک دوسرے سے سیکھنا ہے ۔دریں اثنا سی پیک کلچرل کاررواں کی افتتاحی تقریب سے خطاب کرتے ہوئے انہوں نے کہا کہ سی پیک کلچر کاررواں کی افتتاحی تقریب پر مبارک باد پیش کرتا ہوں۔انہوںنے کہاکہ سی پیک دونوں ملکوں کے عوامی رابطوں اور دوستی کا بھی ذریعہ ہے۔چینی سفیر نے کہا کہ سی پیک دونوں ملکوں کے عوام کو قریب لانے میں مدد گار ثابت ہوگا۔انہوںنے کہاکہ اقتصادی راہداری سے باہمی اعتماد اور محبت کا رشتہ مزید مضبوط ہورہا ہے۔ژاؤ جنگ نے کہا کہ سی پیک سے پاکستان اور چین کے درمیان تعاون کو فروغ مل رہا ہے ٗچینی حکومت اور عوامی سی پیک کی کامیابی کیلئے پرعزم ہیں۔علاوہ ازیں پاکستان میں تعینات چینی سفیر یاؤ ژینگ نے قبائلی علاقوں کو 15 اسکول عطیہ کرنے اور صوبہ خیبر پختونخوا کے 200 پروفیشنلز کو چین میں تربیت دینے کا اعلان کردیا۔پشاور میں حکومتی شخصیات، مختلف وفود اور صحافیوں سے بات چیت میں چینی سفیر یاؤ ژینگ نے کہا کہ چین پاکستان کے ساتھ دوستی مضبوط رکھنا چاہتا ہے اور قبائلی علاقہ جات میں تعلیمی سرگرمیوں میں مدد فراہم کرنے کیلئے تیار ہے۔چینی سفیر نے پاک چین اقتصادی راہداری منصوبے پر بھی روشنی ڈالی اور کہا کہ سی پیک کے
تناظر میں خیبرپختونخوا کی اہمیت سب سے زیادہ ہے۔انہوں نے کہاکہ خیبرپختونخوا کے راستے افغانستان اور وسطی ایشیا سے رابطہ ہوگا۔پاکستان میں دہشت گرد گروپوں کی موجودگی کے حوالے سے یاؤ ژینگ نے از راہ تفنن کہا کہ حقانی نیٹ ورک کی پاکستان میں موجودگی کا کابل میں بڑا چرچا سنا ٗ پاکستان آنے کے بعد سے گلیوں اور راستوں میں ڈھونڈ رہا ہوں تاہم یہ نیٹ ورک نظر نہیں آیا۔
