لاہور(مانیٹرنگ ڈیسک) پیپلز پارٹی کے مرکزی رہنما سینیٹر اعتزاز احسن نے کہا ہے کہ قصور واقعہ نے پنجاب کے حکمرانوں کی تجربہ کاری اور گڈ گورننس کا پردہ چاک کر دیا ہے ،پیپلز پارٹی اپنے مقدمات عدالتوں میں لڑتی ہے جبکہ (ن) لیگ والے اس کے برعکس عدالتوں سے لڑتے ہیں ، نواز شریف پاؤں پر خود کلہاڑی مارنے میں اپنا ثانی نہیں رکھتے ،سانحہ ماڈل ٹاؤن کے متاثرین کو انصاف ملنا چاہیے اور پیپلز پارٹی اس کے لئے اپنی آواز بلند کرتی رہے گی۔ ایک انٹر ویو میں انہوں نے کہا کہ (ن) لیگ شفافیت کے دعوے کرتی نہیں تھکتی

لیکن میرا دعویٰ ہے کہ حکومت ختم ہو لینے دیں ان کی کرپشن کی غضب داستانیں قوم کے سامنے آئیں گی ۔ انہوں نے کہاکہ قصور میں کمسن بچیوں سے زیادتی او ر قتل کے واقعات پر صبر کا پیمانہ لبریز ہونے پر عوام احتجاج کیلئے باہر نکلے لیکن پنجاب حکومت کی پولیس نے جو رویہ اپنایا اس کی جتنی بھی مذمت کی جائے وہ کم ہے ۔ پہلے مار دو پھر نوکریاں اور پھر امداد پنجاب حکومت کا وطیرہ ہے ۔ انہوں نے کہا کہ پیپلز پارٹی آئندہ عام انتخابات کیلئے اپنی تیاریاں جاری رکھے ہوئے ہے اور کسی کیلئے بھی میدان خالی نہیں چھوڑیں گے۔

موضوعات:سینیٹر اعتزاز احسن