لاہور(مانیٹرنگ ڈیسک) پیپلز پارٹی پارلیمنٹرینز کے سربراہ وسابق صدرمملکت آصف علی زرداری نے شر یف خاندان کی فوری گر فتاری کا مطالبہ کرتے ہوئے کہا ہے کہ شریف خاندان کا بھی ایسے احتساب کیا جائے جیسے ہمارا ہوا ہے ‘کر پشن کا گارڈ فادر ہمیں لندن سے مفاہمت کے بجھتا ہے مگر ہم نے مفاہمت کی سیاست مستر دکر دیا ہے ‘شر یف خاندان کا وی آئی پی احتساب ہورہا ہے ‘ روٹی، کپڑا اور مکان انسان کی بنیادی ضروریات ہیں

اس لئے پاکستان پیپلزپارٹی کی ترجیح رہی ہے کہ عوام کے لئے روزگار کے وسائل پیدا کئے جائیں،شہید قائدعوام ذوالفقار علی بھٹو کا نظریہ اور فلسفہ ہی پارٹی کا منشور ہے، قائدعوام ذوالفقارعلی بھٹو نے پہلی مرتبہ ملک کے ہر شہری کو پاسپورٹ بنانے کا حق دیا،۔ آج لاکھوں پاکستانی بیرون ملک مقیم ہیں، وہ خوشحال ہیں اور پاکستان کو زرمبادلہ بھیج کر ملک کی معیشت کر مضبوط کر رہے ہیں۔ میڈیا رپورٹس کے مطابق وہ جمعہ کے بلاول ہاؤس لاہور میں پیپلزپارٹی کی منشور کمیٹی کے اجلاس سے خطاب اور میڈیا سے گفتگو کر رہے تھے۔ اجلاس میں سید نیئر حسین بخاری، سینیٹر سلیم مانڈوی والا، سینیٹر شیری رحمن، میاں منظور وٹو، چوہدری لطیف اکبر، امجد حسین، ڈاکٹر نفیسہ شاہ، صابر بلوچ، اخونزادہ چٹان، نثار احمد کھوڑو اور سید نوید قمر نے شرکت کی۔ اجلاس کے دوران کمیٹی میں شامل اراکین نے اپنی تجاویز پیش کیں۔ صدر آصف علی زرداری نے کہا کہ محترمہ بینظیر بھٹو شہید جب اقتدار میں آئیں تو انہوں نے لاکھوں نوجوانوں کو ملازمتیں فراہم کیں اور ان ملازمین کو بھی بحال کیا جن کو ضیا آمریت کے دوران برطرف کیا گیا تھا۔ آصف علی زرداری نے کہا کہ جن کو غریب عوام کی خوشحالی پسند نہیں انہوں نے محترمہ بینظیر بھٹو شہید کے خلاف نوجوانوں کو روزگار دینے کے ریفرنس بنائے۔

عوام دشمنوں نے محترمہ بینظیر بھٹو شہید کی حکومت کو برطرف کرنے کے بعد بے شمار سرکاری ملازمین کو ملازمت سے فارغ کر دیا مگر جب پاکستان پیپلزپارٹی دوبارہ اقتدار میں آئی تو نہ صرف روزگار کے نئے وسائل پیدا کئے لاکھوں نوجوانوں کو ملازمتیں فراہم کیں اور ان ملازمین کو معاوضے کے ساتھ بحال کیا جن کو نواز شریف کے دور میں ملازمتوں سے فارغ کیا گیا تھا۔ آصف علی زرداری نے کہا کہ تعلیم، صحت اور امن پاکستان پیپلزپارٹی کی بنیادی ترجیح ہے،پاکستان پیپلزپارٹی کا منشور انقلابی ہے۔

آصف علی زرداری نے کہا کہ پاکستان پیپلزپارٹی شہید محترمہ بینظیر بھٹو کی سوچ اور فلسفے کے عین مطابق ملک کو فلاحی ریاست بنانا چاہتی ہے۔ ایسا ملک جہاں انصاف اور ایسی ریاست جہاں عوام کو ترقی کرنے اور آگے بڑھنے کا مکمل حق حاصل ہو۔قبل ازیں چیئرمین منشور کمیٹی سینیٹر سلیم مانڈی والا نے کہا کہ منشور بنانے میں تیزی سے جاری ہے ،منشور کی حتمی منظوری بلاول بھٹو دیں گے ،روٹی کپڑا اور مکان منشور کی بنیاد ہو گا۔ انہوں نے کہا کہ ملک میں بہت سی تبدیلیاں ہو رہی ہیں اس کے مطابق منشور بنے گا ،نیب اور اداروں کی بہتری کے لئے قانون سازی بھی کریں گے ۔

موضوعات:آصف علی زرداری