اسلام آباد(مانیٹرنگ ڈیسک) طوفانی بارشوں کے باعث شہر قائد کی ابتر ہوتی صورتحال کو دیکھتے ہوئے کراچی انتظامیہ نے صورتحال سے نمٹنے کیلئے پاک فوج سے مدد کی درخواست کر دی، آرمی چیف کا حکم ملتے ہی پاک فوج نے امدادی آپریشن شروع کر دیا۔

آئی ایس پی آر کے مطابق اچی انتظامیہ کی جانب سے بارش کے بعد کی صورتِ حال سے نمٹنے کے لیے پاک آرمی سے مدد کی درخواست کی گئی ہے جب کہ فوج نے پانی نکالنے کے لیے واٹر پمپس بھی فراہم کردیے ہیں۔واضح رہے کہ گزشتہ رات سے شہر قائد میں موسلادھار بارش کا سلسلسہ جاری ہے جس کے باعث چھتیں گرنے اور کرنٹ لگنے سے 3 بچوں سمیت 11 افراد جاں بحق جب کہ متعدد علاقوں میں کئی کئی فٹ پانی کھڑا ہوگیا ہے۔متعدد علاقوں میں کئی کئی فٹ پانی جمع ہوگیا ہے جس کے باعث شہریوں کو دفاتر اور کام پر جانے میں شدید پریشانی کا سامنا ہے۔ خراب موسم کے باعث کراچی سے شیڈول متعدد پروازیں بھی منسوخ ہوگئی ہیں اور محکمہ تعلیم نے اسکولوں کی چھٹی کا اعلان کردیا ہے۔شدید بارشوں کے باعث ٹرینوں کی آمدورفت بھی متاثر ہوگئی ہے۔ کینٹ اسٹیشن پر پانی جمع ہوگیا جبکہ ٹرینوں کی روانگی میں تاخیر سے مسافروں کو پریشانی کا سامنا ہے۔ ترجمان ٹریفک پولیس کے مطابق شہر میں آج ٹریفک بھی معمول سے بہت کم ہے ۔ نیشنل ہائی وے، شارع فیصل، راشد منہاس روڈ، یونیورسٹی روڈ، شاہراہِ قائدین، ایم اے جناح روڈ سمیت تمام اہم شاہراہوں پر پانی جمع ہوگیا ہے جس کے باعث گاڑیاں بند ہوگئی ہیں۔ شہر قائد میں سیلابی صورتحال کے دوران انتظامیہ اور حکومت نام کی کوئی چیز نظر نہیں آرہی۔ موسلا دھار بارش کے باعث پبلک ٹرانسپورٹ بھی نہ ہونے کے برابر ہے اور شہری گھروں تک محدود ہوگئے ہیں۔

موضوعات:آرمی چیف پاک فوج کراچی بارشیں