اسلام آباد(مانیٹرنگ ڈیسک)نہال ہاشمی کے سینٹ رکنیت سے استعفیٰ واپس کرنے کی درخواست منظور۔ تفصیلات کے مطابق چیئرمین سینٹ میاں رضا ربانی نے نہال ہاشمی کے سینٹ رکنیت سے استعفیٰ واپسی کی درخواست منظور کرتے ہوئے ایوانا بالا کی رکنیت سے ان کا

استعفیٰ واپس کر دیا ہے۔ سینٹ اجلاس کے دوران چیئرمین سینٹ نے نہال ہاشمی کے استعفے سے متعلق رولنگ پڑھ کر سنائی ۔ چیئرمین سینٹ کا کہنا تھا کہ نہال ہاشمی نے سینٹ رکنیت سے استعفیٰ دیا تھا اور بعد میں انہوں نے خود پیش ہو کر اسے واپس لینے کی درخواست کی تھی ۔ رضا ربانی نے ہدایت کی کہ نہال ہاشمی کے استعفیٰ بارے فیصلے سے ان کی جماعت ن لیگ کو بھی آگاہ کر دیا جائے۔ واضح رہے کہ نہال ہاشمی نے یوم تکبر 28مئی کے موقع پر کراچی میں عدلیہ سے متعلق متنازعہ تقریر کی تھی جس پر ان کی جماعت کی جانب سے ان کی پارٹی رکنیت معطل کرتے ہوئے انہیں سینـٹ کی سیٹ سے استعفیٰ دینے کے احکامات دئیے گئے تھے جس پر انہوں نے سینٹ کی رکنیت سے استعفیٰ دے دیا تھا تاہم بعد میں انہوں نے چیئرمین سینٹ میاں رضا ربانی کے سامنے پیش ہو کر استعفیٰ کی تصدیق کے حوالے سے موقف اپنایا تھا کہ انہوں نے استعفیٰ دبائو کے تحت دیا جسے منظور نہ کیا جائے۔

موضوعات:استعفیٰ چیئرمین سینٹ نہال ہاشمی