اسلام آباد(مانیٹرنگ ڈیسک) ملک بھر کے تعلیمی اداروں میں قرآن پاک کی لازمی تعلیم دینے کا فیصلہ، وزارت مذہبی امور و بین المذاہب ہم آہنگی قانون سازی کیلئے بل متعارف کرائے گی۔ تفصیلات کے مطابق ملک بھر کے تعلیمی اداروں جن میں پرائمری سے یونیورسٹی سطح تک میں قرآن پاک کی لازمی تعلیم، تجوید اور قرآن ریسرچ اکیڈمی کے ساتھ وفاقی سطح پر قرآن کمپلیکس قائم کرنے

کا فیصلہ کرتے ہوئے وزارت مذہبی امور و بین المذاہب ہم آہنگی نے قانون سازی کیلئے بل متعارف کرانے کا فیصلہ کر لیا ہے۔ بل کے مطابق ملک بھر کے تعلیمی اداروں میں مسلم طلبا کو قرآن پاک کی لازمی تعلیم دی جائے گی جبکہ اس کیلئے ہر سکول میں قرآنی تعلیمات کیلئے آدھا گھنـٹہ مختـص کیا جائے گا۔ملک بھر کے تعلیمی اداروں میں قرآنی تعلیمات کیلئے قرأ حضرت کی خدمات حاصل کی جائیں گی۔پہلی سے پنجم تک ناظرہ، چھٹی سے 12 ویںجماعت تک قرآن پاک کی تعلیمات ترجمے کے ساتھ دی جائیں گی، اسی طرح یونیورسٹی لیول پر قرآنی تعلیمات کی فراہمی یقینی بناتے ہوئے بعض آیات کو زبانی یاد کرنا لازمی ہو گا۔ وزارت کے تحت اسلام آباد میں قرآن کمپلیکس قائم کیا جائیگا جہاں پر قرآنی تعلیمات کی فراہمی سرکاری سرپرستی میں کی جائیگی، کمپلیکس میں نایاب قرآنی نسخہ جات کو جمع کرنا اور اشاعت و تبلیغ کا عمل پوری دنیا تک پھیلانے کیلیے اقدامات کیے جائیں گے، قرآن ریسرچ اکیڈمی کا قیام بھی عمل میں لانے کا فیصلہ کیا گیا جس کے تحت وفاق میں ریسرچ اکیڈمی جبکہ یونین کونسل کی سطح تک اکیڈیمیاں قائم کی جائیں گی جہاں قرآن پاک کو حفظ کرانے، صیح تلفظ و اشاعت اور تبلیغ کے انتظامات کئے جائیں گے۔

موضوعات:قرآن کی تعلیم وزارت مذہبی امور