لاہور( این این آئی)تحریک انصاف کے چیئرمین عمران خان کی جانب سے سندھ نیشنل فرنٹ کے سربراہ سردار ممتاز علی بھٹو کو شمولیت کی دعوت کے بعد مثبت پیشرفت جاری ہے ،ملاقات میں پیش کی گئی شرائط پر آمادگی کاعندیہ ملنے کے بعد ممتاز بھٹو نے اپنی پارٹی میں مشاورت کا عمل شروع کرنے کی ہدایت کر دی جبکہ حتمی فیصلہ ممتاز بھٹو کی بیرون ملک سے وطن واپسی پر ہوگا ۔

ذرائع کے حوالے سے بتایا گیا ہے کہ سردار ممتاز علی بھٹو نے عمران خان کو دورہ سندھ کے دوران ہونے والی ملاقات میں شمولیت کی پیشکش پر کچھ شرائط پیش کی تھیں جن کے مطابق پیپلز پارٹی سے کسی بھی سطح پر اتحاد نہیں ہوگا ، اقتدار میں آنے کی صورت میں بینظیر بھٹو شہید کے قتل کی نئی ایف آئی آر او ر تحقیقات کرائی جائیں گی جبکہ کرپشن کرنے والوں کا بلا امتیاز کڑا احتساب کیا جائے گا ۔ ذرائع کے مطابق پی ٹی آئی کے ایک مرکزی رہنما نے سردار ممتاز بھٹو کے بیرون ملک ہونے کے باعث ان کے صاحبزادے امیر بخش بھٹو سے ٹیلیفونک رابطہ کر کے شرائظ پر آمادگی کا عندیہ دیتے ہوئے مستقبل کے حوالے سے بات کی ہے ۔ ذرائع کے مطابق بیرون ملک موجود ممتاز بھٹو کو رابطے کے حوالے سے آگاہ کیا گیا ہے جس کے بعد انہوںنے پارٹی کے اندر اوراپنے ہمدردوں سے مشاورت کا عمل شروع کرنے کی ہدایت کر دی ہے جبکہ حتمی فیصلہ ان کی رواں ماہ کے آخری ہفتے بیرون ملک سے وطن واپسی پر تمام ذمہ داروں کے اجلاس میں کیا جائے گا ۔ ذرائع کے مطابق اجلاس میں سندھ نیشنل فرنٹ کو تحریک انصاف میں ضم کرنے کی تجویز پر مشاورت ہو گی ۔یاد رہے کہ ممتاز بھٹو اس سے قبل اپنی جماعت کو (ن) لیگ میں بھی ضم کر چکے ہیں تاہم (ن) لیگ کی طرف سے وعدے پورے نہ کئے جانے پر سندھ نیشنل فرنٹ کو دوبارہ بحال کر لیا گیا۔

موضوعات:تحریک انصاف ممتاز بھٹو